Tutulğan şahıslarnı daa bir deñişim eñ yaqın vaqıtta olacaq, cedvel ve logistikanen bağlı soñki muzakereler keçirile, dep bildire aprelniñ 15-nde Ukraina prezidentiniñ ofisi, dep haber ete Azatlıq Radiosı.
«Jurnalistlerniñ malümatına köre, deñişim keçe. Bu kerçek degil. Ne yazıq ki, qarşılıqlı deñişim qıyın ve qoşma añlaşmalarnı talap ete. Bu sefer azat etilüvi karantin vaziyetinde keçkeni içün esnas zorlaştırıla ve alğan vatandaşlarımız içün observatsiyanıñ evelden teşkil etilüvini talap ete», – dep aytıla Prezident ofisiniñ Facebook haberinde.
Deñişimniñ tam künü daa yoq, «er daim muzakere etile», dep qoşmı müessise.
Daa evel deñişim Pashağa yaqın, aprelniñ 19-ı, arfesinde olacaq, dep haber etilgen edi.
Ukraina ve «LDNR» gruppirovkaları arasında tutulğanlarnı soñki deñişim 2019 senesi dekabrniñ 29-nda oldı. Donetsk ve Lugansk vilâyetleriniñ işğal altındaki rayonlarından 81 ukrainalı azat etildi: 76-sı Ukraina ükümetiniñ kontroli altındaki topraqqa qayttı, daa beşi Rusiye gibrid quvetleri kontrol etken yerlerde qalmağa istedi. 76-dan 12-si endi sabıq cenk esirleri ola, 64-ü – vatandaştır. Ekinci tarafqa 124 insan teslim etildi.
Sentâbrniñ 7-nde deñişim çerçivesinde rusiyeliler tutqan 35 ukrainalı Ukrainağa qayttı, Rusiyege Ukrainada çeşit cinayetlerde, şu cümleden Vatanğa hainlik yapqanında qabaatlanğan 35 Rusiye ve Ukraina vatandaşı teslim etildi. Oleg Sentsov, Oleksandr Kolçenko, Volodımır Baluh, Edem Bekirov, Yevğen Panov, Pavlo Ğrıb, Stanislav Klıh, Mıkola Karpük, Roman Suşçenko, Artur Panov, Oleksiy Sizonovıç ve 2018 senesi noyabrde zapr etilgen 24 deñizci azat etildi.
Kyivdeki Rusiye elçihanesi Ukraina tarafından azat etilgenlerniñ fotoresimini derc etti, amma anda aytılğan 35 insandan tek 24-ü bar. Rusiyege teslim etilgenlerniñ resmiy cedveli alâ daa yoq. Rusiyege MH17 uçaq seferiniñ davasında şübheli Vladimir Tsemah ve «RİA Novosti Ukraina» baş muarriri Kirill Vışinskiy teslim etilgeni belli.
