Ukraina prezidenti Petro Poroşenko martnıñ 25-nde Rusiyeniñ Qırım işğalinden soñ Azatlıq Radiosınıñ Qırım.Aqiqat leyhası «yarımadadaki adise-vaqialar ve andaki vaziyet aqqında Rusiye propagandasınıñ tesiri altında olmağan malümatnı» almağa imkân bergen «aman-aman yekâne leyha» olğanını bildirdi.
Poroşenko bazarertesi künü Facebook saifesinde Qırım.Aqiqat beş yıllıq işi devamında bir çoq kere basqığa oğrağan edi, dep qayd etti.
«Bu 5 yıl içinde işğalci akimiyet leyhanıñ işini bir qaç kere blok etmege, matbuat serbestligini sıñırlamağa tırışqan edi. Aqmescit mahkemesiniñ muarririyet müellifi Mıkola Semenağa aytmağa qorqmağan aqiqat içün çıqarğan ükmü parlaq bir örnek ola. Faqat Qırım.Aqiqat telüke ve basqığa baqmadan, işine devam ete. Eminim, siziñ fedakâr işiñiz ve tecribeñiz sayesinde Qırım evge, Ukrainağa qaytacaq künni yaqınlaştıramız», – dep qayd etti Ukraina prezidenti.
Qırım.Aqiqat – Azatlıq Radiosınıñ ukrain hızmetiniñ Qırım leyhası – 2014 senesi mart ayında, Rusiye Federatsiyasınıñ Qırım yarımadasınıñ işğali ve ilhaqınıñ ilk künlerinde çalışıp başladı. Qırım.Aqiqatnıñ rus tilli saytı 2014 senesi martnıñ 25-nde, ukrain tilli ve qırımtatar tilli saytları ise aprel ayınıñ başında çalışıp başladı.
Beş yıl içinde Azatlıq Radiosınıñ ukrain hızmetiniñ Qırım leyhasınıñ saytlarını 115 million oquyıcı ziyaret etti. Bizim esaplarımızğa köre, olardan dörtte biri qırımlı ola. Oquyıcılar 200 million saifeden ziyadesini baqtı. 2014 senesi noyabr ayında açılğan Qırım.Aqiqatnıñ YouTube kanalına 65 biñ insan abune oldı, 58 million kere video baqıldı ve baqılğan videolarnıñ aman-aman 250 million daqqası bar.
2014 senesi iyün ayından başlap Qırım taqımı er afta çıqqan eki unikal televizion programmasını azırlay – umummilliy ve regional telekanallar içün «Qırım.Aqiqat» ve halqara uyduda «Nastoyaşçeye vremâ» telekanalında ve Şarqiy Avropa ve Merkeziy Asiyanıñ 25 memleketten ziyadesinde uydu ağlarında çıqqan «Qırım.Aqiqat».
2015 senesi sentâbr ayında Qırım taqımı Qırım.Aqiqat Radiosını açtı. O, Qırımnıñ büyük qısmı, Ukrainanıñ cenübi-şarqına ve Rusiyeniñ Şimaliy Kavkaz dağ aldı rayonlarına 549 AM orta dalğalarında yayın yapa, 2017 senesi sentâbr ayından başlap ise Qırım.Aqiqat Radiosınıñ kanalı 105,9 FM dalğasında gece kündüz çalışa, onı Qırımnıñ şimali-şarqında diñlemek mümkün.
Qırım.Aqiqat büyük içtimaiy ağlarda da mevcut. Twitterdeki abunecilerimiz birinciler sırasında haber ala. Instagramda ise saytta tapıp olamaycaq fotoresimlerimizni paylaşamız, Facebookta ise eñ meraqlı munaqaşalar ola. «Vkontakte» ve «Odnoklassniki» saifelerimizge de kiriñiz. Eñ müim haberlerni Telegramda da er kün ala bilesiñiz.
2016 senesi Rusiye akimiyeti saytnı Qırımda blok etmege tırışıp başlamazdan evel Medialogiya Rusiye tedqiqat teşkilâtı Qırım.Aqiqatnı üç yıl devamında eñ çoq alıntı ketirilgen Qırımnıñ internet neşirleri sırasına kirsetken edi.
Basqı ve telükelerden sebep Qırım.Aqiqat ile işbirligi yapqan elliden ziyade jurnalist Qırım yarımadasını terk etmege ya da işini toqtatmağa mecbur edi.
Meşur qırımlı jurnalist Mıkola Semena Qırım.Aqiqat ile çalışıp, Rusiye kontrolindeki Qırım mahkemesi tarafından 2,5 yılğa şartlı olaraq ve 3 yıl devamında açıq (hususan jurnalist) faaliyetinen oğraşmaq yasağına üküm etildi. Qırım.Aqiqatta derc etilgen maqalesi içün o, Rusiye topraq bütünligine qast etüvde qabaatlandı.
Eki qırımlı cemaat jurnalisti – Qırım.Aqiqatqa malümat bergen Nariman Memedeminov ve Server Mustafayev – Rusiye akimiyeti tarafından apiske alınıp, terrorizm ve ekstremizmde qabaatlanğan edi.
Rusiye akimiyeti tarafından Qırım.Aqiqat ile işbirligi yapqanından şübheli sayılğan Aqmescit, Aqyar ve Yaltada çalışqan 6 jurnalistniñ evinde FSB hadimleri 2016 senesi tintüv keçirip tehnikalarını alğan edi.
Qırım.Aqiqat ile işbirligi yapqan bir qaç ukrainalı jurnalistiniñ Qırımğa kirişi Rusiye akimiyeti tarafından yasaq etildi. Bazılarını yarımadanı terk etmege mecbur ettiler. Soñki adiselerden biri – 2019 senesiniñ başında FSB Qırım.Aqiqatnıñ foto mühbiri Alina Smutkonıñ Qırımğa kirişini yasaqladı.
Bir sıra qırımlı jurnalist Qırım.Aqiqat ile çalışqanından şübheli sayılıp, Rusiye ve yerli kütleviy haber vastalarında aqaretlene,
Qırım.Aqiqatnıñ baş muarriri Volodımır Prıtulanıñ aytqanına köre, leyha yarımadadaki Rusiye akimiyetiniñ qarşı areketlerine baqmadan, qırımlılar içün çalışmağa devam ete. Qırım.Aqiqat jurnalistleri oquyıcılarına yerli kütleviy haber vastalarında olmağan malümatnı bereler: tsenzurasız haberler, fikir paylaşuvı, problemlerniñ açıq muzakereleri.
