Martnıñ 7-nde Çehiya prezidenti Miloş Zeman Ukraina prezidenti Volodımır Zelenskıyge "Beyaz arslan" (aliy devlet mukâfatı) berilmesi aqqında qarar qabul etkenini bildirdi.
"Ukraina prezidenti cesaret ve cesürlik kösterdi. ABD onı tahliye etmege teklif etti, amma o, bu teklifni red etip, memleketiniñ mudafaasına reberlik etmek içün paytahtta qaldı", - dedi Zeman devlet mukâfatlarınıñ tantanalı taqdimat merasiminde.
Zeman semetdeşlerini ukrainlerge, hususan Çehiyağa qaçaqlar kibi kelgenlerge yardım etmege çağırdı.
"Sıñırlarımıznıñ yaqınlarında Rusiyeniñ Ukrainağa tecavuzı neticesinde yüz bergen cenk ketmekte. Şimdi Ukraina halqı aqqında tüşünmek kerek", - dep qoştı Zeman.
Çehiya prezidenti Rusiye tarafdarı olğanı ve Vladimir Putinni desteklegeni ile bellidir. O, 2022 senesi fevralniñ 24-nde Rusiyeniñ Ukrainağa tecavuzından soñ öz noqta-i nazarını deñiştirip, Putinge deli dedi. Çehiyanıñ Rusiyege qoyğan sanktsiyaları eñ sert sanktsiyalardan biri oldı.
"Beyaz Arslan" nişanı 1922 senesi Çehoslovakiya devleti ögünde yararlıqlarına köre çetel vatandaşları, belli siyasiy ve içtimaiy hadimlerini mukâfatlandırmaq içün tesis etildi.
