Türkiye Mudafaa naziri Hulusi Akar, memleketniñ işğal etilgen Qırımdan köçmege mecbur olğan qırımtatarlar içün 500 daire quruv añlaşmalarını yerine ketirmege azır olğanını tasdıqladı. Bu aqta Ukraina prezidentiniñ matbuat hızmeti Volodımır Zelenskıynıñ Akar ile yapqan körüşüvinden soñ bildirdi.
Prezident Zelenskıy «Ukrainağa, mustaqilligimizge ve suverenitetimizge er daim qol tutqan» Türkiyege ve şahsen prezident Erdoğanğa teşekkürler bildirdi.
İyülniñ 10-nda Türkiye Mudafaa naziri Hulusi Akar Kyivge kerçekleştirgen resmiy ziyareti çerçivesinde qırımtatar halqınıñ lideri, Ukraina Yuqarı Radasınıñ deputatı Mustafa Cemilevnen ve Türkiye Cumhuriyeti ile parlamentlerara bağlar gruppasınıñ reisdeşi Rustem Umerovnen körüşti. Körüşüv vaqtında Türkiye nazirine işğal etilgen Qırımda insan aqları bozulğanını tarif etkenler.
Türkiye prezidenti Recep Tayyip Erdoğan Ukraina prezidenti Volodımır Zelenskıynen 500 qırımtatar qorantası içün mesken qurmağa añlaştı, dep bildirgen edi.
Herson vilâyeti devlet memuriyetiniñ yolbaşçısı Yuriy Gusev Türkiye elçisi Yağmur Ahmet Gülderenen körüşip, işğal etilgen Qırımdan memleket içinde köçip kelgenler içün 500 daireni quruv leyhasınıñ yerine ketirilmesini muzakere etti.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
