Link açıqlığı

Saatnıñ esas haberi

Ukraina prezidenti Rusiye ile muzakereler aqqında: «Olar bayağı zor keçe»


Volodımır Zelenskıy
Volodımır Zelenskıy

Ukraina prezidenti Volodımır Zelenskıy NBC telekompaniyasına bergen intervyüsında Rusiye ile muzakereler qıyın keçe, dep bildirdi. Onıñ aytqanına köre, er angi silâlı zıddiyetni «muzakere masası başında toqtatmaq mümkün».

«İlk evelâ, muzakereler devam ete. Bayağı zor keçe», – dep qayd etti Zelenskıy.

O, Rusiye ile muzakerelerde Ukraina içün müim meselelerni aydınlattı: cenkniñ bitirilüvi, Ukraina içün telükesizlik kefaletleri, memleketniñ suvereniteti ve onıñ topraq bütünligini ğayrıdan tiklev.

Ukraina lideri silâlı zıddiyet çezilüvi muzakerelerinde Ukraina ve Rusiyeniñ aytqanları «bir qarar kerçekçi oldı», dep aytqan edi. «Amma qararlarnıñ Ukraina menfaatları içün olması daa vaqıt alır», – dedi prezident Telegramdaki video muracaatında. O, «qıyın, amma müim», dep qayd etti.

Rusiye ve Ukraina eyyetleri muzakerelerniñ dört raundını keçirdi: ilk üçü Beyazrusiyede oldı, soñkisi video formatında keçirildi. Em Ukraina, em Rusiye eyyetleriniñ vekilleri muzakerelerde belli bir ilerilev qayd etildi, dep ayta, amma tafsilâtlar aydınlatılmay.

Ukraina prezidenti ofisiniñ yolbaşçı mesleatçısı Mıhaylo Podolâk Rusiye ile muzakerelerde prezidentler Vladimir Putin ve Volodımır Zelenskıy muzakere etecek ve imzalaycaq vesiqalar azırlana, dep bildirdi.

Rusiye Federatsiyası prezidentiniñ matbuat kâtibi Dmitriy Peskov devlet yolbaşçıları muzakereler içün degil, añlaşmalarnı tizmek içün körüşmeli, dep ayttı.

Financial Times neşiri martnıñ 16-nda bir malümat derc etti. Oña köre, «muzakerelerge celp etilgen üç insan» barışıq añlaşmasınıñ ilk variantınıñ mündericesi aqqında bildirdi. O, ateş toqtatıluvı ve Rusiye askerleriniñ çekilüvi olğan 15 maddelik bir plan eken.

Buña qarşılıq olaraq Kyiv neytralitet ilân etmeli, Ukraina ordusınıñ sayısı sıñırlamalı, NATOğa kirüvden vazgeçmeli ve öz toprağında arbiy baza ya da silâlı ittifaqdaşlarnı yerleştirmemeli.

Mıhaylo Podolâk, gazetada tek Moskvanıñ talapları bar, dep bildirdi.

«Financial Times Rusiye tarafınıñ talaplarını köstergen qaralama variantnı derc etti. O qadar. Ukraina tarafınıñ öz fikirleri bar. Bu etapta tasdıqlağan yekâne şeyimiz – ateş toqtatıluvı; Rusiye ordusınıñ çekilüvi ve bir sıra memleketniñ telükesizlik kefaletleri», – dep ayttı Podolâk.

Avropa Birligi ve NATOğa kirüv Ukraina Anayasasında qayd etilgen.

Ukrainağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.

Mesken rayonlarğa top, çoqlu ateş sistemaları ve ballistik raketalar vastasınen ateş açıla. Rusiye ordusınıñ zırhlı tehnikası Kyiv ve Rusiye sıñırına yaqın bir qaç vilâyet merkezini sarıp almağa tırışa.

Rusiye Ukrainağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.

Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: rukrymr.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.

XS
SM
MD
LG