Ukraina prezidenti Petro Poroşenko Kyiv şeer devlet memuriyetiniñ Kolonnıy salonına şahsen kelip, noyabrniñ 13-nde 75 yaşını toldurğan qırımtatar halqınıñ lideri, Ukraina Yuqarı Radasınıñ deputatı, Ukraina prezidentiniñ qırımtatar halqı işlerinden vekâletlisi Mustafa Cemilevni hayırladı.
Petro Poroşenko, Cemilevni Kyiv şeer devlet memuriyetinde keçirilgen tantanalı merasim vaqtında tebrikledi, dep bildire Qırım.Aqiqat mühbiri.
Ukraina prezidenti, Mustafa Cemilevge Azatlıq Nişanını bererek, hayırlav sözüni aytıp, qırımtatarlarnıñ milliy liderini «devir timsali» ve «ulu ukrainalı» dep adlandırdı.
Ukraina prezidenti qayd etti ki, «Cemilev kibi bir lider olsa, Qırım mıtlaq serbest olacaq», dep bildire Qırım.Aqiqat mühbiri.
Mustafa Cemilevni Ukraina parlamenti ve Ukraina Nazirler Şurası adından merasimde Yuqarı Rada reisiniñ birinci muavini İrına Geraşçenko ve Ukraina tasil ve ilim naziri Liliya Grınevıç tebriklediler. Kyiv şeer devlet memuriyetiniñ Kolonnıy salonına Kyiv şeer yolbaşçısı Vitaliy Klıçko da hayırlamağa keldi.
Qırımtatar milliy lideri Mustafa Cemilev sözge çıqıp, «Qırım serbest olğanına qadar yaşamağa niyet etkenini» qayd etti.
Azatlıq Nişanı – Ukrainanıñ devlet sıñırları ve mustaqilliginiñ qorunması, ukrain cemiyetiniñ birleşmesi, demokratiya, içtimaiy-iqtisadiy ve siyasiy islâatlarnıñ inkişafı, anayasa aqları ve insan ve vatandaş serbestliginiñ qorçalanmasına büyük isse qoşqan ve ayrı yer alğan vatandaşlarnı qayd etmek içün berilgen Ukraina devlet mukâfatıdır.
Mustafa Cemilev, Rusiye ve Qırımda siyasiy sebeplerden tutulğan qırımlılarnıñ balalarına yardım etmege çağırğan edi.
Cemilev, «Qırım» Vaqfı» hayriye teşkilâtınıñ esabına para yollap, «Qırımlı siyasiy mabüslerniñ balalarına yardım» dep yazmağa rica etti.
Mustafa Cemilev, qırımtatar halqınıñ aqları oğrunda küreşip, halqınıñ ürmetini ve qırımtatar milliy lideri statusını qazandı.
1966-1983 seneleri devamında o, altı kere apiske alınğan edi. Yedi kere mahküm etilgen Cemilev «sovetler qurumını aqaretlegen fikirleri» içün 15 yıl apiste yattı. 1975-1976 seneleri Omsk apishanesinde 303 kün açlıq narazılığını tuttı. 1986 senesi azatlıqqa çıqtı.
1991 senesinden 2013 senesine qadar Qırımtatar Milliy Meclisiniñ reisi edi. Mustafa Cemilev – III-VII çağırılış Ukraina Yuqarı Radasınıñ halq deputatı. 2014 senesi noyabr ayından berli – VIII çağırılış Ukraina halq deputatıdır.
2014 senesi avgustnıñ 20-nde Ukraina prezidenti Petro Poroşenkonıñ №657/2014 fermanı esasında Ukraina prezidentiniñ qırımtatar halqı işlerinden vekâletlisi olaraq tayin etildi.
Mustafa Cemilev Türkiyedeki Selçuk universitetiniñ uquq fahriy doktorı, «Ukrain cemiyetiniñ demokratizatsiyası içün» Orlık halqara mukâfatınıñ laureatı ola. Nansen medali (BM), V ve IV seviyeli Yaroslav Mudrıy knâziniñ nişanınen taqdirlengen edi.
