Ukraina, Poloniya ve Litvaniya Tış işler nazirleri Dmıtro Kuleba, Yatsek Çaputoviç ve Linas Linkâviçüs Rusiyeni istilânı toqtatıp, işğal altındaki Qırımdan ve Donbas topraqlarından ordusını çıqarmasına çağırdılar.
Bu aqta üç memleketniñ nazirleri qabul etken qararda aytıla.
«Ukrainada devam etken Rusiye istilâsı köz ögüne alınsa, nazirler halqara uquqqa riayet etilüvni em üç taraflı işbirligi, em halqara teşkilâtlar çerçivesinde (NATO, Avropa Birligi, BM, Avropa Şurası, OSCE) temin etmek maqsadınen faaliyetini koordinatsiya etmek azır olğanını bildire», – dep aytıla haberde.
Qararda nazirler Ukraina mustaqilligi, suvereniteti ve topraq bütünligine qol tutqanını tasdıqlay.
«Tış işler nazirleri, Rusiye Federatsiyası tarafından Qırım Muhtar Cumhuriyeti ve Aqyar şeerini ilhaq etüv ıntıluvını qararlı bir şekilde takbih etkenini bildire. Bu ıntıluvnı qabul etmeyler ve iç bir vaqıt qabul etmeycekler. Olar Rusiye Federatsiyasını Ukrainanıñ Donetsk ve Lugansk vilâyetlerinden ordusını çıqarmasına çağıralar», – dep aytıla qararda.
Rusiye Tış işler nazirligi Ukraina, Poloniya ve Litvaniya Tış işler nazirleriniñ beyanatına daa cevap bermedi.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
