İyülniñ 19-nda Lviv vilâyetinde Ukraina, Poloniya ve ilhaq etilgen Qırımdan kelgen alim ve gençlerniñ iştiraki ile «Gemi» («Arka») ananeviy dinlerara seminarı başlandı. 14-ünci kere keçirilgen halqara konferentsiyanıñ şiarı – «Biz epimiz bir gemidemiz».
Azatlıq Radiosı mühbiriniñ bildirgenine köre, seminar künlerge bölüne – leh, yeudiy, ukrain, qırımtatar. Er biri yañı mevzuğa bağışlana. Laf Poloniyanıñ NATO tecribesi, Lüblin Birligi ve Avropa Birligi, yeudiylerniñ tarihında Holokost, etnografik haritada yeudiyler, zemaneviy Ukrainanıñ medeniy bölüvleri, qırımtatarlarnıñ zıhniyet kodu aqqında ketecek.
«Epimizni müim şeyler birleştire – insan ayatı, segvi, iman qıymetleri. Bu sene Klimentiy Şeptitskiyniñ yıllığı olacaq. Halqlarımıznı, bütün yahşı insanlarnı birleştirgen Andrey Şeptitskiy kibi adlardan biri. Dnepropetrovsk vilâyetinde bizler 14 soqaqqa dünya halqları diniy adamlarınıñ adını berdik», – dep ayttı İgor Şçupak, «Tkuma» Holokostnı ögrenüv ukrain institutınıñ müdiri.
Seminar Poloniyanıñ Lviv Baş konsullığı, «Qırım evi», «Tkuma» Holokostnı ögrenüv ukrain institutı, Ukraina katolik universitetiniñ desteginen keçirile. Tedbirniñ esas maqsadı – yaş insanlarğa diniy ve milletlerara tolerantlıqnı ögretmektir.
«Gemi» dinlerara seminarı vaqtında onıñ iştirakçileri leh, yeudiy, qırımtatar ve ukrain ananelerinen tanış ola – leh oyunları, ukrain toban örüvi, ukrain toy ve qırımtatar oyunları dersleri keçirilecek.
«Gemi» dinlerara seminarı iyülniñ 24-ne qadar devam etecek.
