Link açıqlığı

Saatnıñ esas haberi

Ukraina OSCE-ni Rusiyeni Qırımdaki taqipler içün takbih etmege çağırdı – elçi


Yevgen Tsımbalük
Yevgen Tsımbalük

Viyanadki halqara teşkilâtlar yanında Ukrainanıñ daimiy temsilcisi Yevgen Tsımbalük şuranıñ oturışında, OSCE aza devletlerini Rusiyeni işğal etilgen Qırımdaki taqipler içün takbih etmege çağırdı.

“Aza devletlerni Rusiye tarafından Ukraina vatandaşlarınıñ taqip etilmesini takbih etmege ve tezavuzcı devletke qarşı siyasiy ve diplomatik basqını arttırmağa çağıramız”, – Tsımbalükniñ aytqanlarından “Ukrinform” alıntı ketire.

Qayd etilgenine köre, elçi diplomatlarnıñ diqqatını “işğal altındaki yarımadada halqara gumanitar uquqnıñ bozulması” adiselerinden birine – Rusiyede Qarasuvbazar “Hizb ut-Tahrir davası” ile bağlı mahkeme qararına çekti.

“Bundan evel defalarca olghanı kibi, mahkemege qadar tahqiqat ve mahkeme esnası çoq sayılı usul bouvları ile yapılğan, advokatlarnıñ tarafından suçlanğanlarnıñ alâqadarlıqsızlığını isbatlağan deliller ise bütünley körmemezlike uruldı”, – dep saya Yevgen Tsımbalük.

Yanvarnıñ 12-nde, salı künü, Rostov-na-Donudaki Cenübiy bölgeniñ arbiy mahkemesi Qarasuvbazar “Hizb ut-Tahrir davası”nıñ mabüslerine üküm çıqardı: Enver Ömerovğa 18 yıl Ayder Cepparovğa 17 yıl, Riza Ömerovğa 13 yıl.

Ukraina Yuqarı Radasınıñ insan aqları vekâletlisi Lüdmila Denisova, yanvarnıñ 12-nde Cenübiy bölgeniñ arbiy mahkemesi Qarasuvbazar “Hizb ut-Tahrir davası”nıñ mabüslerine çıqarğan ükümni takbih etti ve halqara toplulıqnı küç-quvetini birleştirmege davet etti.

Ukraina TİN Rusiyeden Cenübiy bölgeniñ arbiy mahkemesiniñ Qarasuvbazar “Hizb ut-Tahrir davası” boyunca bugünki qararınıñ lâğu etilmesini ve “mahküm etilgen Enver ve Riza Ömerovlar ve Ayder Cepparovnıñ ve diger ukrain siyasiy mabüsleriniñ deral azat etilmesini” talap etti.

Ukrainanıñ Avropa Şurasındaki daimiy vekili Boris Tarasük Rusiye mahkemesiniñ Qarasuvbazardaki «Hizb ut-Tahrir davası» mabüsleri, qırımtatar musulmanlarına qarşı çıqarğan yañı ükmüni takbih etti.

Avropa Birligi Rusiyeni Qarasuvbazardaki «Hizb ut-Tahrir davası» mabüslerini ve diger tutulğan ukrainalılarnı azat etmesine çağırdı.

Bundan evel ABD elçihanesi yanvarniñ 12-nde Rusiyedeki mahkeme tarafından qırımtatarlarğa çıqarılğan ükümni takbih etti.

Avropa elçileri de Qarasuvbazardaki «Hizb ut-Tahrir davası» mabüsleriniñ ükmüni takbih etti.

«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.

«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.

XS
SM
MD
LG