Link açıqlığı

Saatnıñ esas haberi

Ukraina OSCE-de: «Rusiye Qırımdaki demografik deñişmelerni qanuniyleştirmege istey»


Yevgen Tsımbalük
Yevgen Tsımbalük

Ukrainanıñ OSCE-deki missiyası Rusiyeniñ Qırım yarımadasında ealiniñ cedvelge alınuvını takbih etti.

"Vaqtınca işğal etilgen Qırımdaki vaziyet pek raatsızlandıra. Bu sefer Rusiye vaqtınca işğal etilgen topraqta ealini cedvelge alıp, yarımadadaki demografik deñişmelerni qanuniyleştirmege istey. Ukraina suverenitetine qarşı daa bir tecavuziy areketni takbih etemiz", - dedi Yevgen Tsımbalük.

Missiya Rusiyeni Ukrainağa qarşı tecavuziy areketlerni, qanunsız işğalni toqtatmağa, Donetsk ve Lugansk vilâyetleriniñ ayrı rayonlarını işğalden azat etmege, Keriç boğazı ve Azaq deñizinden Qara deñizde serbest gemiler qatnavını temin etmege çağırdı.

Rusiyede oktâbrniñ 15-nden noyabrniñ 14-ne qadar eali cedvelge alınacaq. Sakinler aqqında malümat Qırımda da toplanacaq. Yarımada sakinlerini rusiyeliler 2014 senesi de cedvelge alğan edi, o vaqıt Qırımda milliy terkipniñ deñişmeleri qayd etildi.

Rusiyeniñ 2014 senesi Qırımda keçirgen cedvelge aluv malümatına köre, cedvelge alınğan Qırım ealisi 1,89 million kişi, Aqyar ealisi ise 393 biñ insan oldı.

Ukraina akimiyeti bu raqamlarğa esaslanıp, Rusiyeni vaqtınca işğal etken yarımadağa vatandaşlarını ketire, dep qabaatlay. 2001 senesi Ukraina ealini cedvelge alğanda yarımadada ukrain ve qırımtatarlarnıñ sayısı bayağı çoq edi.

Bloklav ve tsenzurasız haberler! Qırım.Aqiqat qullanımını qurmaq içün iOS ve Android.

XS
SM
MD
LG