Link açıqlığı

Saatnıñ esas haberi

Ukraina ombudsmeni: Baluhnıñ alı – «pek ağır»


Vladimir Baluh
Vladimir Baluh

Rusiye işğal etken Qırımda apiste tutulğan ve SİZOda 192 künden berli açlıq tutqan ukrain faali Vladimir Baluhnıñ alı «pek ağır», dep bildire Ukraina Yuqarı Radasınıñ insan aqları vekâletlisi Lüdmila Denisova.

«Apishane memuriyeti tarafından zorbalıq kördi, cigeri, sırtı ve başına urğanlar. Alı pek fenalaştı… Vladimir tibbiy yardımğa muhtac. Ümüt etem ki, eñ yaqın vaqıtta Qızıl Haç Halqara komiteti oña mustaqil ekimlerni yollar», – dep yazdı Denisova sentâbrniñ 25-nde Facebookta.

Ombudsmenniñ aytqanına köre, o, Qızıl Haç Halqara komitetiniñ prezident muavini Jil Karbonyerge muracaat etip, Baluhnı acele sürette ekimlerge baqtırılmasına isse qoşmağa çağırdı.

Denisovanıñ bildirgenine köre, o, Rusiye zenaatdaşı Tatyana Moskalkovadan yardım istese de, bir netice olmadı.

Baluhnıñ advokatı Olga Dinze, Qırımda açlıq tutqan ukrain faali Vladimir Baluhnı köksünde ağrı pek raatsızlağanını bildirgen edi.

Onıñ aytqanına köre, Baluh izolâtornıñ tibbiy bölük ekimleriniñ yardımını istemeyip, Qızıl Haç Halqara komitetiniñ ekimlerini kirsetmege talap ete. Dinzeniñ qayd etkenine köre, ukrainalı tutulğan izolâtor şaraitleri talaplarğa uymay, şu cümleden Avropa insan aqları mahkemesiniñ açlıq tutqan mabüslerni tutuv talaplarına zıt kele.

Rusiye nezaretindeki Qırım Yuqarı mahkemesi, sentâbrniñ 24-nde ukrain faali Vladimir Baluhnıñ imayesi Aqşeyh rayon mahkemesiniñ vaqtınca tutuv izolâtorınıñ faaliyetini bozuv cinaiy işi boyunca çıqarğan qararına qarşı bergen şikâyet arizasınıñ baqılmasını qaldırdı.

«Baluh video konferentsiya bağı odasına çıqmağa razı olmayıp, onı imayeniñ şikâyeti baqılacaq mahkemege alıp ketmege talap ete», – dep tarif etti Baluhnıñ advokatı Olga Dinze.

Qırımda apiste tutulğan ukrain faali Vladimir Baluh 2018 senesi martnıñ 19-nda başlağan müddetsiz açlıqnı devam ete. Bir aydan berli bir şey aşamağan Baluh Arhiyepiskop Klimentni diñlep, kisel içmege, peksimet aşamağa razı olğan edi.

İyülniñ 5-nde Rusiye kontrol etken Aqşeyh rayon mahkemesi ukrain faali Vladimir Baluhqa 5 yıl apis cezası ve 10 biñ ruble (4 biñ grivna) para cezasını tayin etti.

FSB Vladimir Baluhnı 2016 senesi dekabrniñ 8-nde tuttı. FSB hadimleri Vladimir Baluh yaşağan evniñ çardaqında 90 patron ve bir qaç trotil taş tapılğanını bildirgen edi. Baluhnıñ imayesi ve aq qorçalayıcıları onıñ Ukrainağa qoltutqanı içün repressiyalarnıñ qurbanı oldı, dep tüşüneler. Onıñ evinde Ukraina bayrağı bar edi.

XS
SM
MD
LG