Ukraina Yuqarı Radasınıñ insan aqları vekâletlisi Lüdmila Denisova Rusiye mahkemesiniñ oktâbrniñ 29-nda Rostov-na-Donuda Bağçasaraydaki «Hizb ut-Tahrir davasınıñ» mabüslerine çıqarğan ükmüni «qanunsız» dep adlandırdı.
«Dördü umumen 56 yılğa azatlıqtan marum etildi! Rusiye prokurorları qırımtatarlarnıñ yapmağan cinayetleri içün qanunsız apiske alınmasına irişip oldı. Vatandaşlarımız sert rejimli koloniyada uzun apis cezalarını aldı. Rusiye qabaatlavı köstergen «delillerniñ» boş olması ve uydurılması şaşırta. Episi şaatlıqlarını toqtamayıp qarıştırğan FSBniñ eki gizli şaatınıñ aytqanlarına esaslandı. Rusiye tarafından yapılğan tsinizm ve yalan qırımlı qorantalarnı başsız qaldırdı, bir aile birden üç insansız qaldı: Osman Seytumerov ve Seytumer Seytumerov doğmuş ağa-qardaş ola, Rustem Seytmemetov dayıları ola», – dep aytıla Denisovanıñ Facebook haberinde.
Onıñ malümatına köre, mahküm etilgen Amet Suleymanovnıñ saqatlığı ve muntazam tibbiy baquvğa ihtiyacı bar, çünki ciddiy yürek problemleri bar.
«Onıñ içün 12 yıl sert rejimli koloniyada qalmaq ölüm demektir. Ukraina vatandaşlarına qarşı qanunsız ükümni takbih etem. Qırımtatarlarnı ve qanunsız tutulğan diger ukrainalılarnı mahkemege oğratıp, işğalci memleket Rusiye halqara uquq normalarını, İnsan aqları ve esas serbestliklerini qoruv şartnamesini ve Umumiy insan aqları beyannamesini boza», – dep tüşüne Denisova.
O, halqara missiya, aq qorçalayıcı teşkilât ve diplomatik korpus vekillerini «Rusiyeni qanunsız mahküm etilgen Ukraina vatandaşlarınıñ sebepsiz tutulmasını ve mahkeme etilmesini toqtatmasına ve olarnı vatanlarına qaytarmasına mecbur etmege» çağırdı.
Rusiye tarafı Denisovanıñ aytqanlarına daa cevap bermedi.
Rostov-na-Donu Cenübiy okrugınıñ arbiy mahkemesi oktâbrniñ 29-nda Bağçasaraydaki üçünci «Hizb ut-Tahrir davasınıñ» mabüslerine üküm çıqardı. Mahkeme qırımlılarğa 12 yıldan 17 yılğa qadar apis cezalarını berdi.
Advokatlar, ükümge qarşı istinaf şikâyetlerini berecek, dep bildirdi.
Ukrainanıñ Rostov-na-Donu konsulı Taras Malışevskiy, Ukraina tarafı bu ükümge lâyıq cevap berecek, dep ayttı.
Rostov-na-Donu (Rusiye) Cenübiy okrugınıñ arbiy mahkemesinde Rusiye qabaatlavınıñ vekilleri oktâbrniñ 20-nde Bağçasaraydaki «Hizb ut-Tahrir davasınıñ» dört mabüsi içün 66 yıllıq apis cezasını talap etti.
Hatırlatamız, «Memorial» aq qorçalayıcı merkezi Bağçasaraydaki «Hizb ut-Tahrir davasınıñ» mabüsleri Seytumer Seytumerov, Osman Seytumerov, Amet Suleymanov ve Rustem Seytmemetovnı siyasiy mabüs dep tanıdı.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
