Ukraina Sağlıq naziri Viktor Lâşko Rusiyeniñ Ukrainağa kerçekleştirgen yañı ücümi neticesinde 198 vatandaş elâk oldı, aralarında üç bala bar. Bu aqta nazir Facebookta yazdı. Onıñ aytqanına köre, biñden çoq insan yaralandı.
«Ne yazıq ki, operativ malümatqa köre, istilâcılarnıñ qolundan 198 kişi elâk oldı, üçü bala, 1115 insan yaralandı, 33-ü bala», – dep ayttı o.
Aynı vaqıtta Lâşko fevralniñ 25-nde Ukraina ekimleri bomba sığınağında eki qadınnı doğurttı.
«Rusiye işğalcileri başlatqan cenkniñ üçünci künü patlav ve ateş altında yaşayış devam ete ve yañı doğğan ukrainalılar ağlay. Tünevin Hersonda ateş altında bomba sığınağında donatılğan loqsahanelerden birinde eki oğlançıq dünyağa keldi», – dep yazdı nazir.
Onıñ qayd etkenine köre, arbiy areketlerge baqmadan, tibbiy sistema çalışmağa devam ete. Hususan, COVID-19 pandemiyasınen küreş devam ete.
Ukraina Tış işler nazirliginiñ malümatına köre, keçken künü, fevralniñ 25-nde, Ukrainada Rusiye ordusınıñ ateşleri sebebinden eki bala elâk oldı ve 33 vatandaş obyektine ateş açıldı.
Ukrainada Rusiye ücüm etken soñ arbiy vaziyet ilân etildi. Fevralniñ 24-nde saba saat 5-te Rusiye prezidenti Vladimir Putin «DNR» ve «LNR» gruppirovkalarınıñ «muracaatından» soñ Donbasta «mahsus operatsiya» başlatqanını ilân etti.
Prezident Volodımır Zelenskıy umumiy seferberlik buyruğını imzaladı. Ğarp memleketleri Ukrainağa yapılğan ücüm sebebinden Rusiyege qarşı yañı sanktsiyalarnı qullanıp başladı.
Doğrudan ücümge baqmadan, Kreml Ukraina işğali niyetini inkâr ete. Rusiye Mudafaa nazirligi Ukraina tarafınıñ tüşürilgen Rusiye uçaqları, patlatılğan zırhlı tehnika, Rusiye arbiyleriniñ ölümleri aqqında malümatını red ete ve Ukraina şeerlerine ateş açılmay, dep bildire.
Fevralniñ 24-nde Kreml Putinniñ ücümniñ maqsadı «Ukrainanı askeriysizleştirüv ve denatsifikatsiyası» olğanına dair aytqanlarını tekrarladı.
Rusiye ücüminiñ ekinci kününde Ukraina prezidenti Volodımır Zelenskıynıñ matbuat kâtibi Sergey Nikiforov Ukraina Rusiye ile muzakerelerden vazgeçmedi ve taraflar muzakere esnası olacaq yer ve vaqıtnen bağlı mesleatlar keçire, dep bildirdi.
