Ukrainanıñ vaqtınca işğal etilgen topraqlarnıñ reintegratsiya meseleleri nazirligi yanında işğal etilgen Qırımda ve Donbasnıñ işğal etilgen yerlerinde olğan insan aqları bozuvlarını qayd etecek merkezni qurmağa niyetleneler.
Bu aqta Ukrainanıñ vaqtınca işğal etilgen topraqlarınıñ reintegratsiya meseleleri naziri, baş nazir muavini Oleksiy Reznikov «Savik Şusterniñ söz serbestligi» yayınında ayttı, dep haber ete «Ukrinform».
«İnsan aqları bozuvlarını qayd etecek merkezni quramız, qarar alındı. Nazirligim yanında olacaq bir qurulış. İnsan aqları – mülk, ahlâq ve digerleri – cedvellerini bermege razı olğan aq qorçalayıcı teşkilâtlarınen muzakere esnasındamız», – dep qayd etti Reznikov.
Daa evel Ukraina vekili Yevğen Tsımbalük OSCE Daimiy şurasınıñ online toplaşuvında Milliy azlıqlarnıñ işleri yuqarı komissarı Lamberto Zanyerni işğal etilgen Qırımda insan aqları bozulğanına diqqat ayırmasına çağırdı.
2014 senesiniñ işğalinden soñ Qırımdaki Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
