Link açıqlığı

Saatnıñ esas haberi

Ukraina nazirligi, Türkiyeniñ yardımı ile qırımtatarlar içün birinci 500 daire qayda qurulacağını bildirdi


Ukraina baş naziriniñ muavini, Ukrainanıñ vaqtınca işğal etilgen topraqlarınıñ reintegratsiya meseleleri naziri Oleksiy Reznikov ve Ukrainada Türkiye elçisi Yağmur Ahmet Güldere Rusiye işğali sebebinden yarımadanı terk etmege mecbur olğan qırımtatarlar içün ev qurucılığı leyhasını muzakere ettiler. Bunı Ukraina Reintegratsiya nazirliginiñ matbuat hızmeti haber etti.

«Söz, mecbur köçken sayılğan qırımtatarlar içün 1000 daireniñ quruluvı aqqında kete. Leyha eki basamaqtan ibaret: birincisi çerçivesinde – Herson, Mıkolayiv ve Kyiv vilâyetlerinde 500 daire qurulacaq; ekinci çerçivesinde – daa 500 daire, amma olarnıñ yeri daa belli degil», – dep yazıla bildirmede.

Ukraina baş naziri Denıs Şmığal ve Türkiye prezidentiniñ yardımcısı Fuat Oktay körüşip, qırımtatarlar içün ev quruv meselesini muzakere ettiler. Matbuat hızmetiniñ malümatına köre, Ukraina baş naziri Türkiyege kerçekleştirgen iş ziyareti vaqtında Rusiye işğali sebebinden yarımadanı terk etmege mecbur olğan qırımtatarlar içün ev qurucılığı saasında Türkiye ile işbirligi başlağanını qayd etti.

Türkiye prezidenti Recep Tayyip Erdoğan, Ukraina prezidenti Volodımır Zelenskıynen 500 qırımtatar qorantası içün ev qurucılığı aqqında añlaştı, dep bildirgen edi. Daa soñra Türkiye eyyeti Herson ve Geniçeskte topraq baqıp sayladı.

2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.

2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.

Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.

XS
SM
MD
LG