Link açıqlığı

Saatnıñ esas haberi

Ukraina nazirligi Mıkolayıvde qırımtatarlar içün evler ne vaqıt qurulacağını tarif etti


Oleksiy Reznikov
Oleksiy Reznikov

Mıkolayıvde qırımtatarlar ve imtiyazları olğan insanlar içün 200 daire 2021 senesiniñ soñunda qurulıp başlaycaq, dep bildirdi Ukrainanıñ vaqtınca işğal etilgen topraqlarınıñ reintegratsiya meseleleri nazirliginiñ matbuat hızmeti.

Qayd etilgenine köre, Mıkolayıvde ev ve infrastruktura «Severnıy» mikrorayonında qurulacaq.

«Türkiye ortaqlarımız memleketimizdeki vaziyetni añlap, vaqtınca köçip kelgen qırımtatarlarnı meskennen temin etüv meselesinde yardım etecektir», – dep bildire müessise yolbaşçısı Oleksiy Reznikovnıñ aytqanlarını nazirlikniñ matbuat hızmeti.

Aprelniñ 10-nda Oleksiy Reznıkov ve Türkiye çevre ve şeercilik naziri Murat Kurum bir añlaşma imzaladılar. Oña binaen, Türkiye tarafı qırımtatar halqınıñ vekilleri ve imtiyazları olğan insanlar içün mesken quruvında yardım etecek. Programmağa köre 500 daire qurulacaq: Mıkolayıv şeerinde – 200 daire, Herson şeerinde – 200 daire ve Kyiv şeerinde – 100 daire.

Türkiye, Ukrainanıñ Rusiye ile zıddiyetinde Ukrainağa qol tuta, amma Moskvağa qarşı ğarbiy sanktsiyalarğa qoşulmadı. Türkiye, Ukrainanıñ suvereniteti ve topraq bütünligine qol tuta ve qırımtatarlarnı qoruy.

Soñki vaqıtları NATO azası olğan Türkiye ve Ukraina arasında arbiy-tehnik işbirligi de inkişaf ete. Onıñ maqsadı Rusiye istilâsı daa faal tarzda olsa, Ukrainanıñ mudafaa qabiliyetini quvetleştirmek ola.

Aynı vaqıtta Türkiye, NATOnıñ diger azalarından farqlı olıp, Rusiye ile bir qarar munasebetlerde qalmağa tırışa, NATO sistemalarına zıt kelgen Rusiye silâsını bile satın ala, bu da ABDniñ Ankarağa qarşı kirsetken sakntsiyalarnıñ sebebi oldı.

Qırımnıñ Rusiye tarafından işğal etilüvi

2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.

2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.

Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.

XS
SM
MD
LG