Ukraina Nazirler Şurası 16 yaşını toldurmağan balalarnıñ işğal etilgen Qırımğa kiriş ve çıqış qaidelerini sadeleştirdi. Bu aqta Ukrainanıñ veteranlar, vaqtınca işğal etilgen topraqlar ve memleket içinde köçip kelgenlerniñ işleri nazirliginiñ Qırım Muhtar Cumhuriyeti ve Aqyar meseleleri idaresiniñ yolbaşçısı Sergey Mokrenük Facebookta bildirdi.
«İşdeşlerimnen beraber balalarnıñ vaqtınca işğal etilgen Qırımdan keçiş noqtasından keçüv qaideleri içün deñişmeler azırladıq. Bugün ükümet olarnı tasdıqladı», – dep yazdı Mokrenük.
Qabul etilgen deñişmelerge köre, 16 yaşını toldurmağan bala Qırımdan çıqqanda yanında olğan şahısnen Qırımğa kire bile. Qırımğa kirmek içün ya ana, ya babanıñ olması yeterli ve ekisinden biriniñ notarius tasdıqlağan vekâletnamege kerek qalmadı.
Kyiv kontrolindeki Ukraina toprağında oquğan (kollec, tehnikum, zenaat oquv yurtları) 14 ve 16 yaş arasında balalar keçiş noqtasından özleri keçecek. Ana-babası ya da resmiy temsilcileriniñ yanında olmasına kerek yoq. Keçiş noqtasındaki Ukraina Devlet sıñır hızmetiniñ hadimleri balanıñ oquğan yerini Tasil meseleleri yekâne devlet elektron bazasında teşkerip, balanıñ pasportı esasında oña Qırımdan çıqmağa izin berecek.
Deñişmeler 30 künden soñ işke tüşürile.
Ukrainanıñ ükümeti portalı Nazirler şurasınıñ qararını şimdilik derc etmey.
İyül ayında Ukraina Nazirler şurasınıñ №474 qararı işke tüşürildi. Oña binaen, 16 yaşını toldurmağan qırımlılarğa memuriy sıñırdan Ukraina pasportı olmağanda keçmege ruhset berildi. 16 yaşını toldurmağan balalar işğal etilgen Qırımdan Ukrainanıñ iç ve çetel pasportını resmiyleştirmek içün çıqa bile. Keçiş noqtasında doğum şeadetnamesi, yanında olğan insannıñ pasportı kösterilmeli.
Bundan evel 16 yaşını toldurmağan balalar Qırımdan çıqqanda iç ya da çetel Ukraina pasportını ya da yolcu vesiqasını köstermek kerek edi, yanında ise ya anası, ya babası ya da diger resmiy vekilleri olmaq kerek edi.
2014 senesiniñ başında Qırım Rusiye tarafından ilhaq etilgen soñ Ukrainanıñ qıtadaki qısmı ile yarımada arasında şeklen memuriy, lâkin kerçekte aqiqiy olğan sıñır keçti. Herson vilâyetinde Qırım ile memuriy sıñırda üç kiriş/çıqış kontrol noqtası çalışa – «Kalançak», «Çonğar» ve «Çaplınka».
