Granatağa oşağan bir şeyi olğan er adam Ukraina Nazirler şurasınıñ binasına kirdi, dep haber ete Kyiv polisiniñ matbuat hızmeti, dep bildire Azatlıq Radiosı.
«Saba saat 10-larda Nazirler Şurası binasına kimligi belli olmağan er adam kirip, cebinden patlayıcı cihazğa oşağan bir şey çıqardı ve onı patlatacaq dep ayttı. Kyivde mahsus polis tedbirleri keçirile. Al-azırda er adamnen muzakereler keçirile», – dep bildirdi polis.
Cinayetni toqtatmağa razı olmasa, er adamğa qarşı «qanun belgilegen polis tedbirlerini» qullanmağa planlaştırıla.
Daa evel içtimaiy ağlarda Nazirler şurası binasında granata patlatacaq olğan er adamnıñ videosı peyda oldı.
