Ukraina Nazirler kabineti aperelniñ 7-nde olıp keçken oturışı vaqtında qırımtatar tiliniñ inkişaf kontseptsiyasını qabul etti. Bu kün tertibiniñ ilk suallerinden biri edi.
Ukrainanıñ vaqtınca işğal etilgen topraqlarınıñ reintegratsiya meseleleri nazirligi teklif etken vesiqa leyhasında, Qırım ve Aqyar işğal etilgen soñ «qırımtatar tiline tehditler artqanı ve UNESCO-nıñ bir çoq köstergiçlerine köre vaziyeti fena olğanı» aqqında yazıla.
Qayd etilgenine köre, «bu kontseptsiyanıñ maqsadı qırımtatar tiliniñ Ukrainanıñ tamır halqlarından biriniñ tili kibi işlemesi içün şarait yaratmaq, qullanuv saalarını keñleştirmek, Ukraina vatandaşlarını etnik mensüpligine baqmadan onı ögrenmege teşviq etmek».
Ukraina baş naziri Denis Şmıgal oturış vaqtında, «qırımtatar tiliniñ inkişafı Qırımnıñ işğalden azat etüv strategiyasınıñ müim bir qısmı olğanını» ayttı.
Bu kontseptsiya leyhasını Reintegratsiya nazirligi Qırımtatar Milliy Meclisi, ihtisaslı ilmiy ve tasil müessiseler, ükümetke bağlı olmağan teşkilâtlar ve mütehassıslar (olarnıñ arasında vaqtınca işğal etilgen Qırım ve Aqyar şeerinden olğanlar da) ile beraberlikte azırladı.
Nazirlik, kontseptsiya Ukraina prezidentiniñ «Vaqtınca işğal etilgen Qırım Muhtar Cumhuriyeti ve Aqyar şeeriniñ işğalden boşatıluvı ve reintegratsiyası içün yapılğan ayrı tedbirler aqqında» fermanınıñ yerine ketirilmesi içün birinci nevbette turğan çare kibi azırlanğanını bildirdi.
Halqnıñ birleşmesi: Aqmescitte qırımtatar tilinden online imlâ keçirildi (fotoresimler)
Yanvarniñ 27-nde Ukrainanıñ işğal etilgen topraqlarnıñ reintegratsiya meseleleri nazirligi «cemaatçılıq ile elektron mesleat» keçirmek içün qırımtatar tilini inkişaf ve populârlaştıruv kontseptsiyasınıñ leyhasını aydınlattı.
Ukraina reintegratsiya nazirligi Google LLC korporatsiyasına muracaat etip, qırımtatar tilini Google Translate servisine kirsetmege rica etti. Nazirlik Duolingoşirketine – çetel tillerini ögrenüv platformasına muracaat etip, olarnıñ servisi esasında qırımtatar tili kursını başlatmağa teklif etti.
