Ukraina Nazirler kabineti qırımtatar tili elifbesiniñ latin urufatına keçmesini tasdıqladı.
Muvafıq qarar sentâbrniñ 22-nde ükümetniñ oturışında qabul etildi, dep haber ete Ukraina Reintegratsiya nazirligi.
Latin elifbesi 31 ariften ibaret. Qayd etilgenine köre, o, A.Yu. Krımskiy adına şarqşınaslıq institutınıñ, A. O Potebnâ adına tilşınaslıq institutı, T.Şevçenko adına filologiya institutınıñ ve V. Vernadskiy adına Tavriya milliy universitetiniñ mütehassısları Qırımtatar Milliy Meclisi ile beraberlikte azırladılar.
«Ükümet fermanı, diger şeyler arasında, qırımtatar tilinde tasil esnasınıñ 2025 senesi sentâbrniñ 1-nece latin urufatınıñ qullanmasına keçirilmesini közde tuta», – dep haber ettiler nazirlikte.
Bundan ğayrı, yaşayışnıñ diger saalarında latin elifbesine esaslanğan qırımtatar tiliniñ qullanmasını rağbetlendirmege avale etilgen.
«Endiden başlap, qırımtatar tili 1991 senesinden soñ ve şimdi latin elifbesine keçken diger türkiy tiller ile daa çoq uyğun şekelde inkişaf etecek. Ve bu Ukrainanıñ strategik ortaqları ve türkiy memleketler ile qarşılıqlı munasebette qoşma imkânlar yaratmaq kerek», – dep qayd etti Teintegratsiya naziri Oleksiy Reznikov.
Ukraina Nazirler şurası aprelniñ 7-nde qırımtatar tiliniñ inkişaf kontseptsiyasını tasdıqladı.
Bu mesele kün tertibinde birincilerden biri edi.
Daa 2015 senesi qırımtatarlarnıñ lideri Mustafa Cemilev Ukraina Medeniyet nazirliginden qırımtatar tiliniñ latin urufatını qullanmasını rica etken edi.
Daa evel berilgen malümatqa köre, 2014 senesi mart ayında Qırımnıñ Rusiye işğalinden soñ yarımadada qırımtatar tiliniñ kirill urufatından latin urufatına keçüv meselesi baqılmay qaldı.
