Ukraina Nazirler şurası iyünniñ 9-nda qırımtatarlar, memleket içinde köçip kelgenler, birleşken quvetler tedbirleriniñ iştirakçileri içün mesken qurucılığı boyunca Türkiye ile añlaşma tasdıqlavına dair qanun leyhasını taqdirledi.
Bu aqta Nazirler şurasınıñ matbuat hızmeti haber ete.
Vesiqa qırımtatarlarğa 450 daire bermege, qalğan 50 daireni ise memleket içinde köçken insanlarğa ve ATO/OSS iştirakçilerine bermege vade ete. Nazirler şurası imzalağan vesiqa Ukraina Yuqarı Radası tarafından tasdıqlanması içün yollanıldı, dep bildire müessise.
Hatırlatamız, eki memleket arasında ilk añlaşmalar aprelniñ 10-nda Ukraina prezidenti Volodımır Zelenskıynıñ Türkiye ziyareti çerçivesinde imzalanğan edi. Ukraina baş nazir muavini, vaqtınca işğal etilgen topraqlarnıñ reintegratsiya meseleleri naziri Oleksiy Reznıkov ve Türkiye çevre ve şeercilik naziri Murat Kurum bir añlaşma imzaladılar. Oña binaen, Türkiye tarafı qırımtatar halqınıñ vekilleri ve imtiyazları olğan insanlar içün mesken quruvında yardım etecek. Programmağa köre 500 daire qurulacaq: Mıkolayıv şeerinde – 200 daire, Herson şeerinde – 200 daire ve Kyiv şeerinde – 100 daire.
Türkiye, Ukrainanıñ Rusiye ile zıddiyetinde Ukrainağa qol tuta, amma Moskvağa qarşı ğarbiy sanktsiyalarğa qoşulmadı. Türkiye, Ukrainanıñ suvereniteti ve topraq bütünligine qol tuta ve qırımtatarlarnı qoruy.
