Ukraina Nazirler şurası Rusiyedeki ukrainalı siyasiy mabüslerniñ meselelerinen oğraşacaq yekâne komissiyanı qurdı, dep bildirdi baş nazir Oleksiy Ğonçaruk. Onıñ aytqanına köre, eskiden böyle eki komissiya bar edi, dep bildire Azatlıq Radiosı.
«Yekâne komissiyanıñ işi hususan esirlikten qaytqanlarğa keyfiyetli ve vaqtında yardım köstermege, şu cümleden maddiy ceetten yardım köstermege yardım etecek. Em de azatlıqtan marum etilgenlerge yardım köstermekten mesüliyetli olğanlarnıñ devlet akimiyeti organlarınen işbirligini keyfiyetli bir şekilde keliştirmege yardım etecek», – dedi Ğonçaruk.
Yanvar ayında Ukraina telükesizlik hızmeti, Donetsk ve Lugansk vilâyetleriniñ ayrı rayonlarında 184 insan qanunsız şekilde azatlıqtan marum etildi, dep bildirdi.
Fevral ayında Ukraina Yuqarı Radasınıñ insan aqları vekâletlisi Lüdmila Denisova, Rusiye işğal etken Qırımda ve Rusiyede 116 ukrainalı qanunsız şekilde tutula.
Sentâbrniñ 7-nde deñişim çerçivesinde rusiyeliler tutqan 35 ukrainalı Ukrainağa qayttı, Rusiyege Ukrainada çeşit cinayetlerde, şu cümleden Vatanğa hainlik yapqanında qabaatlanğan 35 Rusiye ve Ukraina vatandaşı teslim etildi. Oleg Sentsov, Oleksandr Kolçenko, Volodımır Baluh, Edem Bekirov, Yevğen Panov, Pavlo Ğrıb, Stanislav Klıh, Mıkola Karpük, Roman Suşçenko, Artur Panov, Oleksiy Sizonovıç ve 2018 senesi noyabrde zapr etilgen 24 deñizci azat etildi.
Kyivdeki Rusiye elçihanesi Ukraina tarafından azat etilgenlerniñ fotoresimini derc etti, amma anda aytılğan 35 insandan tek 24-ü bar. Rusiyege teslim etilgenlerniñ resmiy cedveli alâ daa yoq. Rusiyege MH17 uçaq seferiniñ davasında şübheli Vladimir Tsemah ve «RİA Novosti Ukraina» baş muarriri Kirill Vışinskiy teslim etilgeni belli.
