Ukraina ükümeti işğal etilgen Qırım ve Herson vilâyetiniñ memuriy sıñırındaki kontrol keçiş noqtalarınıñ işini avgustnıñ 9-ndan itibaren vaqtınca toqtatmağa qarar aldı. Bu qarar avgustnıñ 8-nde Ukraina Nazirler şurasınıñ nevbetten tış toplaşuvında qabul etildi.
Bu aqta Nazirler Şurasınıñ naziri Oleg Nemçinov bildirdi.
«Bugün Ukraina Nazirler şurasınıñ nevbetten tış toplaşuvı oldı. Ükümet vaqtınca işğal etilgen Qırım Muhtar Cumhuriyeti ve Aqyarğa kiriş ve çıqışlarnı vaqtınca toqtatmağa qarar aldı. Qarar SARS-CoV-2 koronavirusı ile başlağan COVID-19 keskin virus hastalığınıñ Ukrainada tarqalmasına yol bermemek içün qabul etildi», – dep yazdı o, Facebookta.
Onıñ malümatına köre, memuriy sıñırdaki keçiş noqtalarınıñ işi 2020 senesi avgustnıñ 9-ı saat 8:00-dan 2020 senesi avgustnıñ 30-ı saat 8:00-ğa qadar vaqtınca toqtatıla.
Nazirler şurası naziriniñ qayd etkenine köre, Qırımda qayd olğan ve anda ya da Aqyarda yaşağan ve anda mülki olğan Ukraina vatandaşları ve qorantalarınıñ azalarına memuriy sıñırdan yarımadağa kirmege izin berilecek.
Qırımda yaşamağan ukrainalılar yarımadadan memuriy sıñırdan çıqqanda cep telefonına «Diy vdoma» qullanımını qoyıp, özüni izolâtsiya etmege razı olmalı.
Milliy menfaatlarnı qorumaq ya da halqara vazifelerni, diplomatik müessiselerniñ vekilleri ve gumanitar missiya vazifelerini yerine ketirmek maqsadınen memuriy sıñırdan keçip, Qırımdan çıqqan şahıslar bu sıñırlavlarğa oğramay.
Nazirler şurasınıñ qararına köre, diger çetel vatandaşları ve vatandaşlığı olmağan şahıslar Qırımdan çıqmaq içün Vaqtınca işğal etilgen topraqlarnıñ reintegratsiya meseleleri nazirligi ile añlaşmalı.
«Vaqtınca işğal etilgen Qırım Muhtar Cumhuriyeti ve Aqyar şeerinden çıqış ve Ukraina vatandaşlarınıñ anda kirişi gumanitar sebep olğan alda Devlet sıñır hızmetiniñ reisi ve Vaqtınca işğal etilgen topraqlar meseleleri nazirligi ile añlaşıp kerçekleştirile», – dep qoştı Nemçinov.
Avgustnıñ 8-nde saba Ukraina prezidenti Volodımır Zelenskıy, Herson vilâyetiniñ memuriy sıñırındaki işğal etilgen Qırımnıñ keçiş noqtaları işini ğayrıdan baqmağa emir etti.
Bu vazife Ukrainada artqan koronavirus hastalarınıñ sayısı sebebinden berildi.
Ukraina dört künden berli koronavirus hastaları boyunca antirekordnı qayd ete. Milliy mudafaa ve telükesizlik şurasınıñ malümatına köre, keçken künü memlekette 1489 yañı koronavirus hastası qayd etildi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
