Cumaertesi künü, martnıñ 14-nde, Ukraina ükümeti koronavirus tarqaluvı ile küreş meselelerini muzakere etmek içün toplaşacaq. Bu aqta Ukraina Tış işler naziri Dmıtro Kuleba «Svoboda slova Savika Şüstera» yayınında ayttı.
«Yarın (martnıñ 14-nde – QA) ükümet toplaşacaq, koronavirusnen ne yapacağımıznı muzakere etecekmiz», – dep bildirdi Ukraina Tış işler naziri, dep haber ete Azatlıq Radiosı.
Al-azırda Ukrainada üç koronavirus hastası qayd etildi: bir kişi – Jıtomır vilâyetinde, eki insan – Çernivtsi vilâyetinde.
Martnıñ 13-nde bir koronavirus hastasınıñ ölümi aqqında haber etildi: Jıtomır vilâyetinde qadın can berdi.
Bir Ukraina vatandaşı martnıñ 13-nde İtaliyada vefat etti.
Martnıñ 12-nde Ukrainada koronavirus yuqunçınıñ qırğınlıq telükesi sebebinden ve COVID-19 tarqaluvına yol bermemek içün karantin başlandı. O, üç afta devam etecek – aprelniñ 3-ne qadar.
Yañı çeşit koronavirus yuqunçı 2019 senesi dekabr ayında Qıtayda tarqalıp başladı.
2019-nCov (COVID-19) virusı büyük koronaviruslar gruppasına aittir. Bazılarda hastalıq qolay keçe, bazılarınla suvuqlanuv ve gripp alâmetleri, em de yüksek sıcaq ve öksürik bar, ağır hastalarda nefes tarlığı qayd etile. Bu öldürici ola bilecek pnevmoniyağa keçe bile.
