Salı künü, oktâbrniñ 20-nde, Rusiye kontrolindeki Qırımnıñ İslâm Terek rayon mahkemesinde «Ukraina milliy batalyonında» iştirak etkeninde qabaatlanğan Mecit Ablâmitovnıñ davası boyunca ilk oturışuv oldı. Qırımlı ve imayesi olmağanda apis cezası uzatılğanı belli oldı.
Bu aqta advokat Ayder Azamatov «Qırım aq qorçalayıcı gruppasına» bildirdi.
«Bugün mahkemede belli olğanına köre, qadı İgor Degtârev müvekkilim ve men, imayecisim, olmağanda oktâbrniñ 14-nde Ablâmitovnıñ apiste tutuv müddetini uzattı. Qadı imaye aqqını bozdı dep çetleşmesini istedik. Qadı aqıl tanışıp, talabımıznı red etti. Bundan ğayrı, bugün sıñırlav tedbirini 6 ayğa uzattı», – dedi Azamatov.
Mahkeme vekilleri oturışuvnı keçirmek qararını açıq sürette izaatlamadı.
Avgustnıñ 19-nda Rusiye FSBsi «ukrain milliy batalyonında» iştirak etkeninden şübheli sayılğan Qırımnıñ İslâm Terek rayonınıñ sakinini tuttı, dep bildirdi. İslâm Terek rayonınıñ sakinine qarşı cinaiy dava açıldı. Al-azırda şübheli tutuldı. FSB, qırımlı 2016 senesi esas Ukrainağa ketip, «Lenur İslâmov qurğan N.Çelebicihan batalyonına» kirdi, dep bildire.
Qırım Muhtar Cumhuriyetiniñ prokuraturası «Noman Çelebicihan göñülli qırımtatar batalyonında» iştirak etkeni içün Ukraina vatandaşınıñ qanunsız tutuluvı ve evinde tintüv keçirilüvi boyunca cinaiy tahqiqat başlattı.
Daa evel Qırımda qurucısı Lenur İslâmov olğan «Noman Çelebicihan göñülli batalyonınıñ» azaları olaraq tanılıp qabaatlanğan üç qırımtatarına qarşı qabaatlayıcı qarar çıqarılğan edi. Bu birleşmeniñ azaları olğanınen bağlı şübheler ile qırımlılarğa qarşı eki ğıyabiy qarar da çıqarıldı.
Ukraina uquq qoruyıcı organları erkânında qırımtatar batalyonını quruv munaqaşası 2016 senesinden berli devam ete.
Ukraina İç işler nazirligine ait Ukraina Milliy gvardiyası, olarnıñ qurulışında «qırımtatar batalyonınıñ» qurulması aqqında beyanatlar şimdilik qanun seviyesinde tasdıqlanmağan beyanatlar olıp qla, dep qayd etken edi.
«Asker» cemaat teşkilâtınıñ yolbaşçısı Lenur İslâmov Noman Çelebicihan «qırımtatar batalyonına» arbiy bölük nomerasını bermege talap etken edi.
