Ukrainadaki saylavlarnıñ birinci turınıñ resmiy neticeleri aprelniñ 7-nde belli ola bile, dep bildire Ukraina Merkeziy saylav komissiyası (MSK).
«Bir künden soñ saylavlarnıñ neticelerini belgilemek içün yarın er şeyni yaparmız, dep ümüt etem. Amma qayd etem: bu kesen-kes degil», – dep ayttı aprelniñ 5-nde MSK reis muavini Yevğen Radçenko, dep bildire Azatlıq Radiosı.
Al-azırda MSK bölge saylav komissiyalarınıñ 199 protokolından 197-sini qabul etti.
Daa eki bölge saylav komissiyasınıñ protokolları aprelniñ 5-nda künniñ soñuna qadar kelmeli.
Qanunğa binaen, Merkeziy saylav komissiyası aprelniñ 10-na qadar rey berüvniñ soñki neticelerini çıqarmalı.
Ukraina prezidenti saylavlarınıñ ekinci turı aprelniñ 21-nde olmalı. Qanunğa köre, bunıñ ögüne namzetlerniñ munaqaşası Cemaat televideniyesinde keçirilmeli.
Martnıñ 31-nde Ukraina prezidenti saylavlarınıñ birinci turı keçirildi. Merkeziy saylav komissiyası saylayıcılarnıñ reylerini saydı: oyuncı ve iş adamı Volodımır Zelenskıy ve şimdiki prezident Petro Poroşenko ekinci turğa keçeler.
