Ukraina Merkeziy saylav komissiyası nevbetten tış Ukraina Yuqarı Radasınıñ saylavlarında protokollarnıñ 33,79 fayızını saydı.
Bu malümatqa köre, birinci yerni (42,15%) «Halq hızmetçisi» («Sluğa narodu») firqası qazana.
«Muhalifet platforması – Yaşayış içün» («Oppozıtsiyna platforma – Za jittâ») (12,7%), «Avropa birdemligi» (8,72), «Vatan» («Batkivşçına») (8,17%), «Ses» («Ğolos») (6,41%) liderden bayağı artta qalalar.
Parlamentke kirmegen birinci siyasiy quvetler arasında «Oleg Lâşkonıñ radikal firqası» («Radıkalna partiya Olega Lâşka») (3,96%), soñra «Küç ve namus» («Sıla i çest») (3,73) ve «Muhalifet bloku» («Oppozıtsiynıy blok») (3,22%) firqaları kele.
Bu malümat umumen alğanda Milliy Exit poll sotsiologlarınıñ aydınlatqan neticelerinen bir ola.
Tünevin Ukrainada parlament saylavları keçirildi. Merkeziy saylav komissiyasınıñ malümatına köre, saylayıcılarnıñ 49,84%-ı rey berdi. Bu raqam Ukraina parlament saylavlarında saylayıcılarnıñ faaligine köre eñ alçaq oldı.
Ukraina Yuqarı Radasına firqa cedvelleri boyunca Qırımtatar Milliy Meclisiniñ beş vekili namzet kösterecek: qırımtatar halqınıñ lideri Mustafa Cemilev ve Meclis reisiniñ muavini Ahtem Çiygoz (Petro Poroşenkonıñ «Avropa birdemligi» firqası), Meclis reisi Refat Çubarov (İgor Smeşkonıñ «Küç ve namus» firqası), Gayana Yüksel (Ukrainanıñ yeşiller firqası), Qırımtatar Milliy Meclisiniñ azası ve Abmecit Suleymanov («Ukraina Halq Areketi»).
Yuqarı Rada saylavlarına tek Qırımtatar Milliy Meclisiniñ temsilcileri namzet köstermey. Olarnıñ arasında – ukrain jurnalisti ve qırımtatar asıllı devlet erbabı, Ukraina informatsion siyaseti naziriniñ birinci muavini Emine Ceppar («Ğroysmannıñ ukrain strategiyası» firqası), Qırımtatar Milliy Qurultayınıñ delegatı Rustem Umerov, «KrımSOS» teşebbüsiniñ koordinatorı Tamila Taşeva ve «VostokSOS» hayriye fondunıñ icra müdiri Aleksandra Dvoretskaya (üçü de Svâtoslav Vakarçuknıñ «Ses» firqasından), qırımlı bloger ve dizayner Liza Bogutskaya (Volodımır Zelenskıynıñ «Halq hızmetçisi» firqası), qırımlı, Ukrainanıñ sabıq halq deputatı Andrey Sençenko («Aq küçü»), cemaat faali, göñülli, Qırımdan köçken Natalya Lütikova («Ukraina Halq Areketi»).
