Fevralnıñ 16-nda Ukraina Medeniyet ve haber siyaseti nazirligi memleketniñ “milliy telükesizligi içün havflı olğanlar” cedveline Hor Turetskiyniñ dört iştirakçisini (Mihail Turetskiy, İgor Tulinov, Vâçeslav Freş ve İgor Zverev) ve “Krematoriy” Rusiye rok taqımınıñ lideri Armen Grigorânnı kirsetti.
Medeniyet nazirliginiñ saytında bu rus artistleri ne içün cedvelge kirsetilgenleri aqqında yazılmağan.
Aynı zamanda, bu çalğıcılar “Ukrainanıñ devlet sıñırınıñ aselet bozuvı” ve “Rusiye işğal etken Qırımda propagandacı tedbirlerde iştirak etüv” içün “Mirotvorets” saytınıñ bazasına da kirsetilgenler.
Hatırlatamız ki, evel Ukraina Medeniyet nazirligi “milliy telükesizlik içün havflı olğanlar” cedveline yedi rusiyeli aktörnı kirsetken edi.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
2014 senesiniñ başında Qırım Rusiye tarafından ilhaq etilgen soñ Ukrainanıñ qıtadaki qısmı ile yarımada arasında şeklen memuriy, lâkin kerçekte aqiqiy olğan sıñır keçti. Herson vilâyetinde Qırım ile memuriy sıñırda üç kiriş/çıqış kontrol noqtası çalışa – «Kalançak», «Çonğar» ve «Çaplınka».
