Ukrainanıñ Rostov-na-Donu Baş konsullığınıñ konsulları SİZO-1-de Qırımdaki «Hizb ut-Tahrir davalarınıñ» mabüslerini ziyaret etti. Bu aqta baş konsul Taras Malışevskiy «Qırım birdemligine» bildirdi.
«Biz vatandaşlarımıznı, mahkeme esnaslarınıñ çeşit basamaqlarında bulunğan qırımtatar musulmanlarını ziyaret ettik – Aluştadaki «Hizb ut-Tahrir davası» çerçivesinde apiske alınğan Ruslan Nagayev, Lenur Halilov, Eldar Kantimirov, Ruslan Mesutovnı, Qarasuvbazardaki «Hizb ut-Tahrir davası» boyunca apiske alınğan Enver Ömerov, Riza Ömerov, Ayder Capparovnı ve yaqında qanunsız mahküm etilgen Rustem Emiruseinovnı. Körüşüvler noyabrniñ 20-nde başlandı, karantin tedbirleri yımşatılğan edi, ve subetlerimizni camdan degil, «canlı» keçirmege imkân oldı. Peyda olğan imkânğa quvandım, menim antikorlarım endi bar (oktâbr ayında COVID-19 oldı – QA), tahqiqat izolâtorına bu belânı ketirmeycegimden emin olğanıma da quvanam», – dedi konsul.
Malışevskiyniñ aytqanına köre, SİZOda tutuv şaraitleri bir qarar.
«SİZO bayağı sıcaq. Subetdeşlerimden de soradım – üşümeylermi, kameralar qızdırılamı? Bir şikâyetleri olmağanını aytqanlar, tutuv şaraitlerini de şikâyet etmediler, «apishane kibi» degenler. Bazıları kameralarda qırımlı musulmanlarnen buluna, digerleri – kavkazlı musulmanlarnen. Er kes kameradaşlarınen yahşı munasebette buluna», – dey Malışevskiy.
Baş konsullıq er birine maddiy yardım yolladı – SİZO tükânından aş ve gigiyena vastalarını almaları içün.
Baş konsul Taras Malışevskiy qırımlılarnıñ sağlıq vaziyetini izaatladı.
«Mesutovnıñ ayağı daa yahşı oldı, şişigi küçüldi, ayağına basa, amma, ebet, pek topallay. Men de, müessise yolbaşçısı da ayağını baqtıq, SİZO yolbaşçısı davet etken nevbetçi ekim de baqtı. Eñ zor vaqtı keçmişte qaldı, dep ümüt etem – bundan evel müessise hastahanesi davet etken cerrah eki kere baqtı», – dep paylaştı baş konsul.
«Subetimiz vaqtında Enver ağa onı da aynı müessise hastahanesiniñ mütehassısları baqtı, dep bildirdi, o, «hastahanege ketmege» azır olğanına dair vesiqalarnı imzaladı, amma bu da Cezalarnı yerine ketirüv federal hızmetiniñ müessiselerinde karantin tedbirleri kene yımşatılğan soñ ola bile. Ayder Capparovnen sağlıq vaziyetinen bağlı ciddiy meselelerni muzakere ettik. Şimdilik tek ağrı kesici qullana, antibiotikler yanğı ile küreşe, qorantadan poçtanen yollağan ilâclarını bekley, advokatnen beraber kontrol etecekmiz – bu künleri cerrah baqtımı, qan talili alındımı, ekim bergen ilâclardan fayda oldımı», – dep qoştı Malışevskiy.
Bir çoq qırımlı siyasiy mabüsniñ tiş ekimi ve protezci hızmetlerine ihtiyacı bar.
Baş konsullıq bu meseleni çezmeşe tırışa, amma şimdilik neticesi yoq – bütün ekimler şimdi tahqiqat izolâtor şaraitlerinde çalışmağa azır degil.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
