Qırımtatar halqınıñ genotsidi qurbanlarınıñ añma kününde Ukrainanıñ Rostov-na-Donudaku Baş konsullığınıñ konsulları Ukraina vatandaşlarını - Rosstov-na-Donu, Taganrog ve Şahtı şeerlerinde tutulğan qırımtatarlarnı, musulmanlarnı ziyaret etti.
Bunı "Qırım.Birdemligi" faallerine Rostov-na-Donudaki Ukrainanıñ baş konsulı Taras Malışevskiy aytıp berdi.
Hususan, SİZO-1-de tutulğan Emir-Üsein Kuku, Enver Ömerov, Ayder Capparovnen, SİZO-2-deki Muslim Aliyevnen ve SİZO-4-teki Arsen Cepparovnen körüştiler.
Ziyaretler vaqtında konsullar ve apisliler Stalin genotsidinde qurban olğanlarnı añdılar.
"Facia bita-qartbabalarınıñ, ana-babalarınıñ, soylarınıñ taqdirlerdinden nasıl keçkeni aqqında er birisinen laf ettik. Elbette ki, bugünki künni de muzakere ettik. Oğlu ve kiyevi ile apis etilgen Enver Ömerov, qırımtatarlar kene sürgünlikke oğratılğanında ve basqınıñ artqanında emin", - dedi Malışevskiy.
Baş konsul haber etkeni kibi, mayıs 18-inde Ukraina diplomatik müessiselerniñ binalarında, Baş konsullığında Ukrainanıñ devlet bayrağınen beraber matem şeriti ile qırımtatar milliy bayrağı da köterildi.
Rostov-na-Donu şeeri Cenübiy okrugınıñ arbiy mahkemesi noyabrniñ 12-nde Yaltadaki «Hizb ut-Tahrir davasınıñ» altı mabüsini koloniyada qalmasına üküm etti. Mahkeme qararına köre, Muslim Aliyev 19 yılğa, İnver Bekirov 18 yılğa, Emir-Usein Kuku 12 yılğa, Vadim Siruk 12 yılğa, Arsen Cepparov 7 yılğa ve Refat Alimov 8 yılğa üküm etildi. Olar sert rejimli koloniyada qalacaqlar.
Rusiyeniñ Amnesty International reisi Aleksandr Artemyev işbu ükümni «siyasiy taqip» dep adlandırdı.
Ukraina Tış işler nazirligi bu üküm sebebinden Rusiyege narazılıq bildirdi.
Bu dava boyunca qabaatlanğanlar 2016 senesi fevral-aprel aylarında Yaltada tutulğan edi. Olarnı Rusiyede yasaqlanğan «Hizb ut-Tahrir» islâm siyasiy teşkilâtına alâqaları bar olğanında qabaatlaylar.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
