Rostov-na-Donudaki Ukraina konsullığınıñ temsilcileri – Taras Malışevskiy ve Yuriy Dovgulâ – tahqiqat tevqifhanelerinde tutulğan 12 qırımtatarnı yoqladılar, dep haber ete “Qırım birdemligi” cemaat birleşmesi.
Faallerniñ malümatına köre, Taras Malışevskiy Novoçerkaskta 3-nci SİZO-da tutulğan ekinci Bağçasaray “Hizb ut-Tahrir davası”nıñ mabüslerini yoqlağan. Qırımtatarlarnen o, baquv şaraitini, istinaf şikâyetlerini ve sağlıq allarını muzakere etken.
“5-nci SİZO-da Server Mustafayevni “Novaya gazeta”ğa abune etken edim ve bütün yanvar devamında bu gazetanı alğanına quvanam. Reberlik ile bütün körüşüvlerden soñ bütün gruppağa saç qırqmaq içün eñ azından bir maşnaçıq olmasınıñ mümkünligini muzakere ettik. Bundan ğayrı ariza ile birini er daim video nezaretiniñ olmağan kamerağa avuştırılmasını istedik”, – Malışevskiyniñ aytqanlarından birleşme alıntı ketire.
Bundan ğayrı konsul Qurman “Hizb ut-Tahrir davası”nıñ mabüslerini de yoqladı. Onıñ bildirgenine köre, “yañı SİZO-da tutuv şaraiti yaramay olğanına baqmadan olarnıñ al-evalı yahşıdır”. Olar, suvuq ve dımlı olğan umumiy kameralarda otura eken.
1-nci SİZO-da Taras Malışevskiy Ruslan Mesutov ve Zekirya Muratovnen korüşken. Mesutov, tiş protezlerini alıp olamağanına şikâyet etken.
Üçünci gruppa saqatı Zekerya Muratov sağlıq alına şikâyet etken: belkemigi ağıra, basımı oynay ve midesi raatsızlay.
Kelecek afta Ukraina Baş konsullığınıñ temsilcileri Vladimir Dudka, Remzi Memetov, Enver Mamutov, Dilâver Gafarov ve Aydın Mamutovnı ziyaret etecekler.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
