Ukrainanıñ Rostov-na-Donu konsulı Taras Malışevskiy tahqiqat izolâtorında bulunğan Bağçasaraydaki ekinci «Hizb ut-Tahrir davasınıñ» mabüslerinen körüşti. Bu aqta «Qırım birdemligi» cemaat birleşmesi bildire.
«O, siyasiy mabüslernen tahqiqat izolâtorı şaraitlerinde tibbiy yardım problemlerini, elâl aş problemlerini, em de tutuv şaraitleriniñ ayrı meselelerini muzakere etti. Bundan ğayrı, konsul olarğa Ukraina ve Rusiye arasındaki deñişim esnasınen bağlı yañı haberlerni aytıp berdi», – dep aytıla haberde.
Malışevskiyniñ aytqanına köre, o, davanıñ sekiz mabüsinen körüşip oldı.
«Netice çıqarmağa qıyın, subet çeşit mevzularda oldı, amma bir hulâsa belli – bu insanlar, vatandaşlarımız Rusiye penitentsiar sisteması içün ne qadar «yabancı» olsa, olarnıñ aqlı, açıqlığı ve ayat sevgisi ile onıñ qaranlıq divarlarında qalmaq o qadar qıyın. Ana-babaları, ömür arqadaşları, balaları, tuvğanları ve yaqınlarınen deşetli ayırılıqnı endi aytmayım», – dep qayd etti konsul Taras Malışevskiy.
Noyabrniñ 15-nde Rusiyeniñ Rostov-na-Donu Cenübiy okrugınıñ arbiy mahkemesi Bağçasaraydaki ekinci «Hizb ut-Tahrir davasınıñ» temelini baqmağa başladı.
2017 senesi oktâbr ayında Rusiye telükesizlik hısmetiniñ hadimleri Bağçasaraynıñ altı sakini Timur İbragimov, Marlen Asanov, Memet Belâlov, Seyran Saliyev, Server Zekiryayev ve Ernes Ametovnı tutup alan edi. FSB olarnı Rusiyede ve onıñ tarafından ilhaq etilgen Qırımda yasaqlanğan «Hizb ut-Tahrir» teşkilâtınıñ azaları olğanında qabaatlay.
«Qırım birdemligi» cemaat teşebbüsiniñ koordinatorı Server Mustafayev ve qırımtatarı, musulman Edem Smailov 2018 senesi mayısnıñ 21-nde Qırımda Rusiye uquq qoruyıcıları tarafından tutulğan edi. Olarnıñ davası Bağçasaraydaki «Hizb ut-Tahrir davasına» ilâve etildi.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
