Ukraina konsulı Taras Malışevskiy, Bağçasaraydaki «Hizb ut-Tahrir davasınıñ» mabüsleri Enver Mamutov, Rustem Abiltarov, Remzi Memetov ve Zevri Abseitovğa Rusiye mahkemesi tarafından çıqarılğan ükümni qanunsız dep adlandırdı.
«Biz bu qararnı qanunsız dep sayamız. Eminmiz ki, bu qararğa alâqası olğan er kes cezasını alacaq. Ukraina bunıñ kibi areketlerni cevapsız qaldırmaz. Olar (mahküm etilgen qırımlılar – QA) azat etilip evge qaytsın dep çalışacaqmız», – dedi konsul.
Şimaliy-Kavkaz okrugınıñ arbiy mahkemesi Enver Mamutovnı sert rejimli tertipke qoyucı koloniyada 17 yıl qalmasına, Rustem Abiltarov, Remzi Memetov ve Zevri Abseitovnı ise sert rejimli tertipke qoyucı koloniyada 9 yıl qalmasına üküm etti.
İç birisi qabaatını tanımadı. Olar davanıñ «siyasiy sebeplerini» qayd etti.
Advokatlar, mahkeme kararını şikâyet etmege niyetlengenini bildirdi.
2016 senesi mayısnıñ 12-nde Bağçasarayda Rusiye telükesizlik hadimleri musulmanlar, qırımtatarlarnıñ evleri ve yerli qavehanede bir sıra tintüvler keçirdi. Neticede Bağçasaraynıñ dört sakini: Zevri Abseitov, Remzi Memetov, Rustem Abiltarov ve Enver Mamutov tutulıp, terrorizmde qabaatlandı. Olar, Rusiyede terroristik dep tanılğan «Hizb ut-Tahrir» teşkilâtında iştirak etkenlerinde şübeli dep sayıla.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
