«Ukraina» telekanalında mayısnıñ 24-nde saat 00:00-da Qırım.Aqiqatnıñ silâ saqlağanında ve kötekleşkeninde qabaatlanıp Rusiye koloniyasında tutulğan qırımlı ukrain faali Volodımır Baluh aqqında çıqarğan vesiqalı film premyerasınıñ keçirilmesi planlaştırıla.
Martnıñ 27-nde Kyivde Docudays UA insan aqları aqqında halqara vesiqalı film festivali çerçivesinde Baluh aqqında vesiqalı filmniñ premyerası olıp keçti.
Qırım.Aqiqat teleleyhasınıñ çekim taqımı işğal etilgen Qırımğa barıp, taqip ve telükege baqmadan, Volodımır Baluhnıñ ömür ikâyesini tarif etmege istedi: nasıl bir oğul, ömür arqadaş ve baba olğanını, tuvğan köyünde onıñ aqqında ne bileler.
Filmde daa evel derc etilmegen levhalar ve qaramanlarnıñ ayatlarında bergen ilk intervbüları bar.
Volodımır Baluh – tamırlı qırımlı, çiftçi, ukrainalı cemaat faali, Ukrain milletçileri kongressiniñ azası. Rusiye Qırımnı ilhaq etken soñ Rusiye vatandaşlığından vazgeçti. 2013 senesi qışta evinde Ukraina bayrağını astı, daa soñra «Sema Yüzü qaramanları soqağı» levhasını tikledi. Rusiye kontrolindeki Qırım mahkemesi onı 5 yılğa üküm etti – eki cinaiy dava boyunca: kötekleşüv ve silâ saqlağanı içün. Narazılıq bildirmek içün Baluh 200 künden ziyade açlıq tuttı. Baluhnıñ imayesi ve aq qorçalayıcılar Ukrainağa qoltutqanı içün repressiyalarnıñ qurbanı olğanını ayta.
