Link açıqlığı

Saatnıñ esas haberi

Ukraina jurnalistleriniñ milliy birligi dünya cemaatçılığını Rusiyeniñ jurnalistlerge qarşı yapqan cinayetlerine diqqat etmege çağırdı


Ukrayina jurnalistleriniñ milliy birligi Rusiye tarafından vatandaş ealisi ve jurnalistlerniñ azatlıqtan marum etilmesine yol berilmey, dep bildirdi. Bu aqta oktâbrniñ 30-31-nde Kanadada keçirilecek "Esirler ve sürgün etilgen şahıslarnıñ azat etilmesi" barışıq formulasınıñ dörtünci maddesi boyunca konferentsiyanıñ iştirakçilerine muracaatta aytıla.

"Bu sadece söz serbestligi, vatandaşlarnıñ aqları ve serbestligi bozulmay, bu toqtatılmalı ve qabaatlılar qanunğa köre cezalandırılmalı olğan insaniyetlikke qarşı cinayetlerdir", — dep aytıla beyanatta.

Olarnıñ malümatına köre, Rusiye Federatsiyasınıñ Ukrayinağa istilâsı başlağanından berli 18 jurnalist öz vazifelerini eda etkende elâk oldı. Rusiye apishanelerinde 30-ğa yaqın matbuat hadimi buluna, şu cümleden Qırım.Aqiqatnıñ frilanseri Vladislav Yesipenko.

"Azatlıq Radiosınıñ jurnalisti Vladislav Yesipenko endi 4 yıldan ziyade Rusiyede apishanede buluna, apishanede vatandaş jurnalisti İrına Danılovıç tibbiy yardım kösterilmeyip hastalanmaqta, onıñ babası yaqında qanunsız şekilde mahküm etilgen qızınıñ azat etilmesi içün küreşkende vefat etti", — dep qayd ettiler olar.

Öz beyanatında olar dünya cemaatçılığını Ukrayina lideri Volodımır Zelenskıynıñ Barışıq formulasına qoşulmağa, em de Ukrayinanıñ Rusiye Federatsiyasına talaplarına qol tutmağa çağırdı: vatandaş esirleriniñ bütün davaları açıq olsun, mabüslerge kiriş imkânı berilsin, sahte davalar boyunca ükümler lâğu etilsin, qanunsız repressiyalarda qabaatlı olğanlar cezalandırılsın.

Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.

Bloklav ve tsenzurasız haberler! Qırım.Aqiqat qullanımını qurmaq içün iOS ve Android.

XS
SM
MD
LG