Ukraina jurnalistleri milliy birligi (UJMB) qırımtatar zenaatdaşlarını zenaat bayramlarınen hayırlap, Ukraina ve dünya jurnalistlerini 2014 senesi Rusiyeniñ Qırım işğalinden soñ zor şaraitlerde çalışmağa mecbur olğan jurnalistlerge birdemlik köstermelerine çağırdı.
UJMB qayd ete ki, Qırımdaki Rusiye akimiyeti «mustaqil jurnalistikanıñ faaliyet köstermesi içün dayanılmaycaq şaraitler» yarattı, neticede «bir çoq qırımtatar neşiri Qırımnı terk etip, esas Ukrainağa köçmege mecbur oldı».
«Qırımda işğalci akimiyet olğanda söz serbestligi ve mustaqil jurnalistika aqqında aytmağa zor. Bir çoq qırımtatar neşiri bu şaraitlerde yarımadanı terk etip, Ukrainanıñ diger regionlarına ketmege mecbur oldı. Jurnalistlerniñ icadiy birligi zenaatdaşlarını ve halqara jurnalist birleşmelerini Qırımda söz serbestligini qorçalağan qırımtatar faalleri ve vatandaş jurnalistlerine birdemlik köstermelerine çağıra», – dep ayttı UJMB reisi Sergey Tomilenko.
UJMB bildirgenine köre, qırımtatar jurnalistleri – Qırımtatar Milliy Meclisiniñ azası, QHA müdiri Gayana Yüksel, dünyada yekâne olğan ATR qırımtatar telekanalınıñ muarririyeti, «Qırım birdemligi» cemaat birleşmesiniñ faallerini taqip etüv – işğal altındaki Qırımda «söz serbestligini bastırmağa tırışqan Rusiye siyasetini isbatlağan zıncırnıñ buğumları ola».
Ukraina jurnalistleri milliy birligi işğal etilgen Qırımdan vatandaş jurnalistlerini öz saflarına qabul etmege azrı olğanını bildirdi. Qırımtatar faalleri, vatandaş jurnalistleri, qırımlı advokatlarğa yarımada işğali şaraitlerinde çalışqan jurnalistlerniñ UJMB-ne kirmek içün ayrı qolaylaştırılğan yolnıñ tizilmesini muzakere etmege teklif etile.
Çarşenbe künü, aprelniñ 10-nda, qırımtatar kütleviy haber vastalarınıñ jurnalistleri Qırımtatar jurnalistikası künü zenaat bayramlarını qayd ete.
Bu kün 2011 senesi Bağçasarayda qırımtatar kütleviy haber vastalarınıñ konferentsiyasında tesis etilgen edi.
Qırımtatar jurnalistikası künü maarifçi İsmail Gasprinskiyniñ «Terciman» eki tilli gazetasınıñ 1883 senesi aprelniñ 10-nda çıqqan ilk sanına bağışlandı.
Neşir türk ve musulman aleminde büyük rol oynadı, qırımtatar cemiyetiniñ uyanuvına ve yañartuvına yol açtı.
Rusiye işğal etken Qırımda Qırımtatar jurnalistikası kününe bağılanğan bir de bir tedbirler aqqında haber etilmey.
