Ukraina jurnalistleri milliy birligi, qırımlı jurnalist Mıkola Semenağa tedaviylenmesi içün Qırımdan Kyivge ketmege izin berilmesinde israr ete. Bu aqta UJMB beyanatında aytıla.
«Biz Mıkola Semenağa Qırımdan Kyivge ketip, tedaviylenmesi içün acele izin berilmesini talap etmege devam etemiz – omurğa ve yürek hastalıqlarından ğayrı, o, ameliyattan soñ reabilitatsiyadan keçmeli. Zenaatı içün mahküm etilgen itibarlı jurnalistniñ Rusiye akimiyeti tarafından devamlı taqip etilmesi, stress ve temas ve areket sıñırlanması – Mıkola Semenanıñ sağlıq vaziyetini kerginleştirgen sebeplerdir», – dep izaatladı teşkilâtnıñ reisi Sergey Tomilenko.
UJMB, «Rusiye akimiyetine semereli tesir etmek» içün ğayret arttırmağa çağıra.
Daa evel haber etilgeni kibi, Semena №7 Aqmescit şeer hastahanesinde ameliyat oldı.
2017 senesi sentâbr ayında Aqmescit mahkemesi Semenanı üç yılğa şartlı olaraq apiske alıp, üç yıl deñeme müddeti ve üç yıl devamında açıq faaliyet köstermesini yasaqlamağa talap etti. Aynı o yılnıñ dekabr ayında Kreml nezareti altındaki Qırım Yuqarı Mahkemesi, açıq faaliyet yasağını eki yılğace qısqartıp, ükmüni qısmen yımşattı.
Mıkola Semena, öz maqalelerinde «fikir bildirüv serbestligini» eda etkenini ayta.
Ukraina Tış işleri nazirligi, ABD Devlet departamenti, Avropa Birligi ve bir sıra halqara teşkilâtlar Mıkola Semenağa qarşı çıqarılğan qararnı taqbih ettiler.
Azat Avropa Radiosı/Azatlıq Radiosınıñ sabıq prezidenti Tom Kent, jurnalist Mıkola Semenağa qarşı qabaatlavlarnıñ esassız olğanını söylep, Qırımda Kremlniñ kontroli altında bulunğan mahkeme tarafından çıqarılğan qarar lâğu etilmek kerek, dedi.
