2021 senesi yanvarniñ 4-üne qadar Qırımdan ve işğal etilgen Lugansk ve Donetsk vilâyetleri rayonlarından memleket içinde köçip kelgen aman-aman 1,5 mln insan qayd etildi. Bu aqta Ukraina içtimaiy siyaset nazirliginiñ matbuat hızmeti bildire.
«2021 senesi yanvarniñ 4-üne qadar, Memleket içinde köçip kelgenler aqqında yekâne malümat bazasınıñ malümatına köre, vaqtınca işğal etilgen Donetsk ve Lugansk vilâyetlerinden ve Qırım Muhtar Cumhuriyetinden memleket içinde köçip kelgen 1 459 170 kişi qayd etildi», – dep aytıla haberde.
Hatırlatamız, qırımlılar köçip kelgenine dair vesiqanı online yaptıra bile.
Daa evel haber etilgenine köre, 2023 senesine qadar vatandaşlarğa, hususan işğal etilgen Qırım sakinlerine, hızmet etüv ağğa avuştırılacaq. Başta banktan ya da akkreditatsiyası olğan başqa merkezden dijital imza almaq kerek. Soñra «Diya» qullanımından faydalanıp, doğuv şeadetnamesi, ID-kartı, çetel pasportı, aydavcı şeadetnamesi, pensiya şeadetnamesini ve diger vesiqalarnı mümkün olacaq.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
