Avgustnıñ 15-nde Geniçesk civarında Qırımtatar resurs merkezi faaller içün teşkil etken «Azatlıq lageri» keçirilgen Arabat belinde qırımtatar Ukraina imayecisi Emil Asanov mukâfat alğan tedbir olıp keçti, dep haber ete Qırım.Aqiqat mühbiri.
Qırımtatar resurs merkeziniñ reberi, #LiberateCrimea halqara areketiniñ koordinatorı Eskender Bariyev Emil Asanovğa «Ukraina halqı, mustaqilligi ve devlet sıñırlarınıñ topraq bütünligini qorçalamaq içün qoşqan issesi, Ukraina halqınıñ eşqına yapqan fedakâr işi içün» Minnetdarlıq yarlığını berdi.
Emil Asanovnıñ işdeşleri adından halq nişanını («Orden» istisal-icat birleşmesi azırlağan) ukrainalı göñülli, İtibar inqilâbı iştirakçini Sergey Serikov berdi.
«Emil Asanov 2014 senesi Rusiye arbiylerine Arabat beliniñ şimaline keçmege bermegen qaramanlardan biri ola. O künleri onıñ yanında edim. O vaqıt ğalebe qazandıq, dep tüşünem», – dep ayttı Serikov.
Yerli akimiyet de Emil Asanovğa minnetdarlıq sözlerini ayttı.
«O qaraman vaqtı aqlımızda qala. Amma Emil şimdi de işançlı omuz olıp qala», – dep qayd etti Geniçesk rayon devlet memuriyetiniñ yolbaşçı muavini Gulnara Bekirova.
Tedbir çerçivesinde «Azatlıq lageriniñ» iştirakçileri, #LiberateCrimea areketi faalleriniñ tek Emil Asanovnen degil, Kremlniñ siyasiy mabüsi Edem Bekirovnen laf etmege imkânları oldı.
Tantanalı tedbir iştirakçileri ögünde qırımtatar icadiy kollektivleri çıqışta bulundı.
