Ukraina dünya toplulığına muracaat etip, Rusiyeniñ Azaq deñizinde yapqan istilâiy areketleri sebebinden sanktsiyalarnı quvetleştirmege ve Montreux Añlaşmasınıñ 19-ıncı maddesine köre İstanbul Boğazını Rusiye gemileriniñ keçişi içün qapatmağa rica etecek.
Bu aqta Ukraina Silâlı quvetleri Arbiy deñiz quvetleriniñ komandanı İgor Voronçenko Kyivde noyabrniñ 29-nda keçirilgen Deñiz telükesizligi meseleleri halqara konferentsiyasında bildirdi.
«Arbiy deñiz quvetleriniñ komandanı olaraq ümüt etem ki, dünya toplulığı qarar alıp, Ukraina devletine qarşı istilâ yapılğanını tanır. Buña esaslanıp ve Montreux Añlaşmasınıñ 19-ıncı maddesine köre, Türkiye Cumhuriyetinden İstanbul Boğazını qapatmasını isteycekmiz. Rusiyeliler halqara uquqnı bozmaq ne demek olğanını añlasın», – dep qayd etti Voronçenko.
Bundan evel AB tış siyaset ve telükesizlik siyaseti vekili Federika Mogerini, Avropa Birligi Qara ve Azaq deñizleri regionlarında askerlerniñ sayısı artmasınen beraber Rusiye tarafından küç qullanılması sebebinden qasevetlene, dep bildirdi.
Kreml kontrolindeki Kiyev rayon mahkemesi çarşenbe künü, noyabrniñ 28-nde, Keriç boğazında tutılğan Ukraina deñizcileri ve Ukraina telükesizlik hızmetiniñ hadimlerini yanvarniñ 25-ne qadar tevqif etti. Aqmescitteki Rusiye mahkemesi tarafından apiske alınğan Ukraina askerleri 6 yılğa azatlıqtan marum qala bile.
Ukraina Arbiy deñiz quvetleri bildirgenine köre, noyabrniñ 25-nde Rusiyeniñ sıñır gemileri Odesa limanından Azaq deñizinde Mariupolge keçken Ukraina Arbiy deñiz quvetleriniñ gemilerine qarşı «açıq istilâiy areketler» kerçekleştirdi. Rusiyeniñ «Don» sıñır kateri Ukraina Arbiy deñiz quvetleriniñ «Yañı Qapu» reyd buksirine aselet çarptı.
Qırımdaki Rusiye FSB idaresi bildirgenine köre, noyabrniñ 25-nde Ukrainağa ait üç arbiy gemi «Rusiyeniñ devlet sıñırından qanunsız» keçip, Keriç boğazı yolunda «telükeli areketler» yaptı.
Daa soñra belli oldı ki, FSB Qara deñizde Ukraina gemilerine qarşı silâ qullandı. Kyivniñ malümatına köre, FSB açqan ateş neticesinde altı Ukraina askeri yaralandı. Rusiye FSBsi Ukraina gemilerine qarşı silâ qullanılğanını tasdıqlap, yaralanğan üç Ukraina deñizcisi aqqında haber etti.
Ukraina telükesizlik hızmeti bildirdi ki, gemilerde Ukraina deñizcilerinen beraber Ukraina telükesizlik hızmetiniñ eki hadimi bar edi.
Noyabrniñ 26-nda Ukraina Yuqarı Radası Keriç boğazında Rusiye arbiyleri tarafından Ukraina gemilerine açılğan ateş sebebinden bir qaç vilâyette cenk vaziyetini ilân etti.
Rusiyeniñ Keriç boğazında yapqanlarını bir sıra Avropa memleketi ve ABD tenqit eteler. NATO, vaziyetni ve Keriç boğazındaki adiselerni diqqatnen közetkenini bildirip, ağır-sabırlı olmağa ve vaziyetniñ daa beterine yol açmamağa çağırdı.
