2014 senesi mayısnıñ 2-nde Odesada olğan facialı adise-vaqialardan soñ açılğan cinaiy tahqiqatta bir insan mahküm etildi, daa üç qabaatlav qararı mahkemege yollandı, dep bildirdi Ukraina İç işler naziriniñ birinci muavini Sergey Yarovoy. Bu aqta Azatlıq Radiosı haber ete.
«Cinaiy tahqiqatta… cinayet işlegenini (qanundan tış silâlı birleşmeni quruv ya da onıñ faaliyetinde iştirak etüv) tanığan kişige qarşı qabaatlav ükmü çıqarıldı. Mahkemege 3 insanğa qarşı qabaatlav qararı yollandı. 2017 senesinden başlap bugünge qadar işbu cinaiy tahqiqat çerçivesinde 1109 insan şaat olaraq sorğuğa çekildi, 13 zarar körgen kişiniñ qoşma sorğusı keçirildi», – dep qayd etti nazirlik Facebooktaki saifesinde mayısnıñ 2-nde.
Bundan evel Ukraina İç işler nazirligi añma tedbirleri keçirilgen Odesa vaziyetini kontrol ete, dep bildirgen edi.
2014 senesi mayısnıñ 2-nde Odesa merkezinde Ultras ve Ukraina tarafdarları olğan küçlerniñ marşına Rusiye tarafdarları silânen ücüm etti. Olar bazıda militsiya artında saqlanıp ateş aça edi, militsiya ise buña mania olmadı. Marşnıñ altı iştirakçisi öldürildi. Neticede Ukrainağa qoltutqanlar yañı numayışqa toplaşıp, Rusiye tarafdarlarınıñ çadır lageri turğan Kulikovo pole meydanına yol aldı.
Rusiye tarafdarı olğan faaller ve olarnıñ tarafdarları Zenaatlar birligi eviniñ binasında saqlandı. Eki taraf da biri-birine yanğan şingenlik şişelerini attı. Evde çıqqan yanğın neticesinde andan atlamağa tırışqan ve Rusiye tarafdarları açqan ateşke oğrağan daa 42 insan elâk oldı. Zıddiyet vaqtında 200 kişi yaralanğan edi.
