Link açıqlığı

Ukraina içtimaiy siyaset nazirligi: qıtada işğal etilgen Qırımdan mecburen ketken yüz insanğa iş tapıldı


Mayıs 28-ne qadar Ukraina emek devlet hızmetine Qırım Muhtar Cumhuriyetiniñ 754 qaçağı muracaat etti, olardan 143 insanğa iş tapıldı.

Bunı Ukraina içtimaiy siyaset Nazirliginiñ matbuat hızmeti bildire.

Onıñ malümatına köre, 611 adamğa yardım etmege devam eteler, olardan 382 kişige iş olmağanından sebep para berile.

Nazirlikte hatırlatqanlarına köre, bu yılnıñ mart ayından başlap Ukrainanıñ er bir vilâyetinde Ukraina vatandaşları – Qırım Muhtar Cumhuriyeti ve Ukraina Şarqiy vilâyetleriniñ qaçaqlarınıñ – yerleştirilüvi boyunca ştablar çalışa. Vatandaşlarğa içtimaiy hızmetlernen qullanmaq mümkün, ve qolay-qolay iş tapmağa ve içtimaiy tölevler almağa imkân berile.

«Böyleliknen, er bir qaçaq şimdi yaşağan yerde emek devlet hızmetine kelip, berilgen imkânlardan faydalanmaq içün nevbetke turmalı. Emek hızmetiniñ regional merkezlerinde dört programma boyunca iş tapmağa yardım eteler: tasilge köre, yañıdan oquv, şahsiy işnen oğraşuv, para tölenilgen cemaat işlerinde iştirak etüv ya da işsizlik içün para yardımı», – dep añlatalar hızmette.

Ukraina içtimaiy siyaset Nazirliginiñ resmiy saytına köre, Qırım işğalinden soñ qıtaiy Ukrainada 13-14 biñ qırımlı qayd etildi. Resmiy olmağan malümatqa köre, olarnıñ sayısı 18-20 biñ adamnı teşkil ete.
XS
SM
MD
LG