Qırımtatar faali Zair Smedlâyevniñ fikirince, UATV telekanalınıñ qırımtatar muarririyetiniñ qapatıluvı Ukraina akimiyetiniñ işğal etilgen yarımadanıñ tamır halq medeniyetine munasebetini köstere ve çeteldeki qırımtatarlarnen bağnı kese.
Bu aqta o, Qırım.Aqiqat Radiosınıñ yayınında ayttı.
«Qırımtatarlarnıñ büyük qısmı çetelde yaşay – belli olğanı kibi, diasporamız vatanda yaşağan halqtan daa büyük ola. Malümat paylaşuvı, bağ qoparıla. Olar içün Ukrainada olğanlarnı ana tilinde bilmek müim edi, ve bugün bu imkânını keseler. Tamır halqnıñ medeniyetine olğan munasebet kösterile, dep tüşünem. Minberlerden saqlap qaldırıp, inkişaf ettirecekler, dep aytalar, asılında ise telüke altında olmağan tillerni inkişaf eteler», – dep qayd etti Smedlâyev.
Yanvarniñ 13-nde UATV halqara yayın ukrain telekanalınıñ ingliz ve qırımtatar tilli muarririyetleri işini toqtattı. Telekanal, Ukraina akimiyeti halqara yayınnı toqtatmağa qarar aldı, dep hatırlattı.
Ukraina memurları, 2020 senesi fevral ayında UATV esasında Ukraina akimiyeti kontrol etmegen topraqlar içün rus tilli telekanal açılacaq, dep ilân etken edi.
