Ukraina halqara ortaqlarnı Rusiyege qarşı sanktsiyalarnı quvetleştirmege çağıra, dep bildirdi Facebookta Ukraina Avropa ve Avropaatlantik integratsiyası meselelerinden baş nazir muavini Olga Stefanişina.
«Biz izçenliknen demokratik islâatlarnı ömürge keçiremiz ve özümizge alğan halqara mecburiyetlerge riayet etemiz. Aynı zamanda, Donbastaki vaziyetniñ kerginleşmesi ğarbiy ortaqlarmız içün bir sınav kibi ola bile. Şunıñ içün areketlernen destekni bekleymiz: sanktsiyalarnı quvetleştirmek, «Şimaliy aqım-2» leyhasınıñ quruluvını toqtatmaq, tecavuzcınıñ melez ücümlerine qarşı turmaq», – dep yazdı Stefanişina.
Onıñ fikrince, Ukrainağa qarşı arbiy küç qullanmaq tehditleri Devlet dumasına saylavlardan evel Rusiye prezidenti Vladimir Putinniñ reytinglerini kötermek içün bir yoldır.
Martnıñ 30-nda Ukraina silâlı quvetleriniñ baş komandanı Ruslan Homçak bildirdi ki, Rusiye, «Zapad-2021» strategik talimlerine azırlıq manaçığınen Ukrainanıñ şarqiy sıñırlarına taktik gruppalarını çeke.
Kreml, Rusiye ordusınıñ Rusiyede areket etmesi diger memleketlerni, hususan Ukrainanı qasevetlendirmemeli, dedi.
Ukrainanıñ ğarbiy ittifaqdaşları oña qol tutqanını bildirdi. Aprelniñ 2-nde ABD ve Ukraina prezidentleri Joseph Biden ve Volodımır Zelenskıy telefonda laf ettiler. Beyaz saraynıñ malümatına köre, «prezident Biden Rusiyeniñ Donbas ve Qırımdaki istilâsı vaziyetinde Ukraina suvereniteti ve topraq bütünligine qol tutqanını tasdıqladı».
Daa soñra Avropa Birliginiñ Tış siyaset ve telükesizlik siyaseti yuqarı temsilcisi Josep Borrell Ukraina akimiyetini Rusiye tarafından yapılğan istilâ vaziyetinde «Avropa Birligi destek köstergenine» işandırdı.
Sıñırda ve Donbasta olğan adise-vaqialar sebebinden NATO da Ukrainağa qol tutqanını bildirdi.
