Ukraina prezidentiniñ Ofisi bildirgenine köre, yanvarniñ 11-nde saat 17:00-da Ukraina prezidenti Volodımır Zelenskıy, memleketi Tehran civarında Ukraina yolcu uçağını «yañlışlıqnen» tüşürgenini tanığan İran prezidenti Hasan Rouhaninen telefonda laqırdı etecek.
Cumaertesi künü Zelenskıynıñ Ukraina halqına hitap etecegi de planlaştırıla.
«Devlet yolbaşçısı İrandaki qaza yerinde çalışqan Ukraina mütehassıslarınen, halqara ortaqlarınen mesleatlar keçirip, İran İslâm Cumhuriyetiniñ prezidentinen telefonda laf etken soñ video muracaatını yapacaq», – dep aytıla Ukraina prezidenti Ofisiniñ haberinde.
İran, Tehran yaqınlarında tüşken «Ukraina halqara ava yollarınıñ» uçağı arbiyler tarafından «yañlışlıqnen» tüşürilgenini tanıdı. Resmiy Tehran malümatına köre, uçaq İslâm inqilâbı qaravul korpusınıñ müim obyektlerinden biri tarafına aylanğanda «duşman nişanı» olaraq köründi. Arbiyler, ABD ile kerginleşken munasebetler sebebinden «eñ yüksek seviyede azır edi», bu «insan hatasına» yol açtı.
Ukraina prezidenti Volodımır Zelenskıy, İran akimiyeti qaza «qabaatını tolusınen almalı», dep israr ete.
«Ukraina halqara ava yolları» ava şirketiniñ PS752 seferli Boeing 737-800NG uçağı yanvarniñ 8-nde saba Tehrandan Kyivge yol alıp, İran paytahtınıñ halqara ava limanından çıqıp tüşti. 176 insan elâk oldı, 167-si yolcu ve 9 ekipaj azası edi. Elâk olğanlar arasında – 11 Ukraina vatandaşı (ekipaj azaları ve 2 yolcu).
Uçaq 2016 senesi yapıldı. Şirketniñ bildirgenine köre, bir problemi yoq edi ve yanvarniñ 6-nda uçuştan evel tehnik teşkerüvi yapıldı.
Daa evel bir sıra kütleviy haber vastası ABD ve diger memleketlerniñ istihbarat menbalarına esaslanıp, Ukraina halqara ava yolları ava şirketiniñ «Boeing» uçağı İran raketasınen tüşürildi, dep bildirdi, daa soñra bunı Kanada ve Büyük Britaniya liderleri de ayttı. İran akimiyeti 176 insan elâk olğan Ukraina uçağı tüşürilgenine dair versiyanı inkâr etken edi.
