Ukraina esirler deñişimi içün 200 kişilik cedvelni yolladı, dedi Ukraina prezidenti Volodımır Zelenskıy TRT Türkiye televizion kanalına intervyü bergende.
"Minskte 200-den ziyade adamnen cedvelni berdik. Bu pek müim. Biz o adamlarnıñ adlarını, bulunğan yerlerini bildik. Olarnı qaydan ve ne vaqıt qaytaracaqlarımıznı bilmeymiz, amma, şübesiz, bunı isteymiz", - dedi Zelenskıy, haber ete Azatlıq Radiosı.
O, Ukraina deñiştirmek istegen adamlarnıñ bazıları endi ölüdir, dep tüşüne.
"Bazıları işkencege oğradı, anda kim bar olğanını bilmeymiz. Amma, yazıq ki, kimer adamlarnıñ tek cesetlerini qaytarıp olacaqmız/ Minsk gruppasında bu meselelernen oğraşqan adamlar bar", - qayd etti Zelenskıy.
Yanvar ayında Ukraina telükesizlik hızmeti, Donetsk ve Lugansk vilâyetleriniñ ayrı rayonlarında 184 insan qanunsız şekilde azatlıqtan marum etildi, dep bildirdi.
Fevral ayında Ukraina Yuqarı Radasınıñ insan aqları vekâletlisi Lüdmila Denisova, Rusiye işğal etken Qırımda ve Rusiyede 116 ukrainalı qanunsız şekilde tutula.
Sentâbrniñ 7-nde deñişim çerçivesinde rusiyeliler tutqan 35 ukrainalı Ukrainağa qayttı, Rusiyege Ukrainada çeşit cinayetlerde, şu cümleden Vatanğa hainlik yapqanında qabaatlanğan 35 Rusiye ve Ukraina vatandaşı teslim etildi. Oleg Sentsov, Oleksandr Kolçenko, Volodımır Baluh, Edem Bekirov, Yevğen Panov, Pavlo Ğrıb, Stanislav Klıh, Mıkola Karpük, Roman Suşçenko, Artur Panov, Oleksiy Sizonovıç ve 2018 senesi noyabrde zapr etilgen 24 deñizci azat etildi.
Kyivdeki Rusiye elçihanesi Ukraina tarafından azat etilgenlerniñ fotoresimini derc etti, amma anda aytılğan 35 insandan tek 24-ü bar. Rusiyege teslim etilgenlerniñ resmiy cedveli alâ daa yoq. Rusiyege MH17 uçaq seferiniñ davasında şübheli Vladimir Tsemah ve «RİA Novosti Ukraina» baş muarriri Kirill Vışinskiy teslim etilgeni belli.
