Link açıqlığı

Saatnıñ esas haberi

Ukraina elçisi Rusiyeniñ İstanbulda «Türkiye-Qırım forumını» keçirmek niyetini takbih etti


Andriy Sıbiğa
Andriy Sıbiğa

Türkiye Cumhuriyetiniñ Ukraina elçisi Andriy Sıbiğa Rusiye akimiyetiniñ İstanbulda «Türkiye-Qırım iqtisadiyat forumını» keçirmek niyetini takbih etti. Bu aqta Sıbiğa Twitter saifesinde yazdı.

Diplomat, oktâbrniñ 1-ne keçirilmesi belgilengen forumnı «Rusiye işğalcisiniñ yerli qoqlalarnen beraber Türkiyede «Qırım» tedbirlerini keçirmek nafile ıntıluvları» dep adlandırdı.

Elçi Sıbiğa forum keçirilmesi «daa bir provokatsiya ve ukrain ve halqara uquqınıñ bozulması ola», dep bildirdi.

Sıbiğa, Türkiye iş adamlarını «diqqatlı olıp, forumda iştirak etmemesine» çağırdı. O, Türkiyege «qoltutqanı içün» teşekkür bildirdi.

Rusiye akimiyeti İstanbulda «Qırım forumını» keçirmek niyetlerini izaatlamay.

Türkiye Rusiyeniñ Qırım ilhaqını tanımadı. Bu sene avgust ayında Türkiye Tış işler naziri Mevlüt Çavuşoğlu memleketiniñ Rusiyeniñ Qırım ilhaqı ve qırımtatarlarğa qarşı basqı meselelerinen bağlı fikri deñişmedi, dep bildirdi.

2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.

2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.

Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.

XS
SM
MD
LG