Ukrainanıñ Almaniya elçisi Andriy Melnık işğal etilgen Qırımnıñ Rusiye içün paalı olması içün «Almaniyanıñ muazzam resurslarını nasıl qullanğanından memnün degil». O, emin ki, Qırım meselesinen Donbasta cenkniñ bitmesi ve işğal etilgen topraqlarnıñ qurtarıluvınen parallel oğraşmalı.
Bu aqta Melnık Qırım.Aqiqatqa bildirdi.
«Resmiy olmağan fikir bu: «Başta Ukraina şarqındaki cenk bitireyik, bunı yapqan soñ ise, ögümizde büyük bir vazife olacaq – Qırım meselesi, onıñ qurtarıluvı, işğalden qurtaruv. O vaqıt Qırım aqqında laf etecekmiz». Cevabım pek sade: «Almaniya – küçlü bir devlet, ve o grossmeyster olaraq birden eki santıraç tahtasında oynamağa bilmeli»… Vaqıt bizge qarşı – bunı almanlarğa daima tekrarlayım: Rusiyede bir şey deñişkenine qadar, 5-10-20 yıl beklemege imkânımız yoq», – dep añlata fikrini elçi.
Melnıknıñ qayd etkenine köre, Qırımnıñ işğalden qurtarıluvı boyunca halqara muzakere meydançığı olmalı.
Rusiyeniñ Almaniya elçihanesi Qırımnı Ukrainağa qaytaruv lafları «kerçekleşmeycek bir hayal» dep adlandırdı.
Kyivdeki soñki matbuat konferentsiyasında Ukraina prezidenti Volodımır Zelenskıy Ukraina işğal etilgen topraqlarını, hususan Qırımnı kontroline qaytaruvdan vazgeçmey, dep işandırdı.
Baş nazir muavini – Ukrainanıñ vaqtınca işğal etilgen topraqlarınıñ reintegratsiya naziri Oleksiy Reznikov Qırım.Aqiqat Radiosınıñ yayınında Ukraina akimiyeti Qırımnıñ işğalden qurtarıluvınen bağlı muzakereler içün halqara meydançıqnı qurmağa istey, dep qayd etti. Amma onıñ ne vaqıt ve nasıl bir formatta olacağını tahmin etip olamay.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
