Ukrainanıñ Çehiyada elçiligi, oktâbr 28-inde Çehiya Cumhuriyeti devlet bayramı sebebi ile resmiy tedbirge "Qırım birligi" rusiyeli qırımatatar teşkilâtınıñ vekilleriniñ davet etilmesine qarşı keskin narazılığını bildirdi.
Bunıñ aqqında ukrain elçilikniñ beyanatında aytıla.
"Biz, suveren Ukrainanıñ topraqlarını ilhaq etmek içün bu Rusiyeniñ qanunsız areketlerini qanuniyleştirmek maqsadınen yapılğan areketlerni nevbetteki provokatsiya kibi ve Ukraina ile Çehiya munasebetlerine kirişüv kibi köremiz", - denile beyanatta.
Elçilik, "işğal etilgen Qırımda qırımtatarlarnıñ temsiliy organı - Meclis yasaq olğan ve yüzlerce qırımatatarlar taqip, apis, basqı etilgen vaqıtta, Qırımnıñ rusiyeli teşkilâtlarınen böyle "oyunlar", daa ziyade tsinik körüne.
"Ümüt etemiz ki, bütün dünyanen beraber Qırım Muhtar Cumhuriyetiniñ Rusiye tarafından işğalini tenqit etken Çehiya Cumhuriyetiniñ resmiy organları ve şahısları kelecekte işğalci akimiyet ve onıñ vekillerinen bağlardan saqınacaq", - denile elçilikniñ beyanatında.
Bundan evel matbuatta, Çehiya prezidenti Miloş Zeman, Kreml nezaretindeki "Qırım birligi" qırımtatar teşkilâtınıñ vekillerini tantanalı ziyafetke davet etkeni aqqında malümat peyda oldı.
"Qırım birligi"niñ Facebook saifesinde, Pragada tedbirni hayriye leyhalarnıñ reberi Tamila Bezaziyeva ziyaret etkeni yazılğan.
Şimdilik Ukraina narazılığına Çehiya akimiyetiniñ cevabı yoq.
