Ukraina akimiyeti eki qırımtatar qadınını ve 7 balasını Suriyeniñ şimaliy-şarqında bulunğan ve Suriye demokratik quvetleriniñ memuriyeti kontrolindeki Roj qaçaqlar lagerinden aldı. Bu aqta mahsus tedbirlerde iştirak etken, amma resmiy izaat berip olamağan Ukraina quvet müessiselerinden biriniñ hadimi Qırım.Aqiqat mühbirine bildirdi.
Onıñ malümatına köre, qırımlılar ve balaları Suriyeden Ukrainağa kele. Ukrainalılar Ukraina telükesizlik hızmeti, Ukraina Tış işler nazirligi, Ukraina Mudafaa nazirliginiñ Baş idaresi ve Tış istihbarat hızmetiniñ mahsus tedbirleri neticesinde azat etildi.
Qırım.Aqiqat, Ukraina Tış işler nazirligine muracaat etip, qırımlılarnıñ Suriyedeki qaçaqlar lagerinden azat etilgenini ve tezden Ukrainağa kelecegini tasdıqlamağa rica etti. Müessise, resmiy izaat ile cevap azırlay, amma şimdilik bu malümatnı ne tasdıqlap ola, ne de red etip ola, dep bildirdi.
Bundan evel Qırımtatar Milliy Meclisi ukrainalı qadınlarnıñ Suriyedeki qaçaqlar lagerinden qaytmasına yardım etmege çağırğan edi.
Refat Çubarovnıñ 2019 senesi mart ayında bildirgenine köre, 21 qadın ve 54 bala – Ukraina vatandaşları – Suriyede «viran etilgen infrastrukturalı zor şaraitlerde» buluna ve Ukrainağa qaytmaq içün yardım istey.
Suriyede 2011 senesinden berli vatandaş cenki devam ete, onıñ neticesinde tahminen 400 biñ kişi elâk oldı.
